Talle paaie in Pretoria is gesluit nadat reënbuie fratsvloede in die stad veroorsaak het.
Volgens Console Tleane, woordvoerder vir gemeenskapsveiligheid, is Centurion, Pretoria-Wes en Pretoria-Noord die ergste getref.
Hippo- en Endstraat in Centurion is gesluit terwyl Von Hagen- en Trans Oranje-straat in Pretoria-Wes gesluit is.
Die DF Malan en De Waal kruising in Capitol Park moes ook sluit, sowel as Burger- en Gerrit Maritz-straat in die weste van Pretoria.
Kerkstraat in Pretoria-Wes was ook gesluit.
“Laagliggende gebiede, laagliggende brûe en duikweë word die meeste geraak deur fratsvloede,” het Tleane gesê.
Poele water versamel in dié areas, wat ‘n gevaar vir motoriste inhou.
Op die hoek van Von Hagen en Trans Oranje het drie motors amper weggespoel terwyl twee motors by die Gerrit Maritz en Burger vasgesit het.
Tot dusver is niemand beseer nie, maar motoriste in die area is aangesê om versigtig te ry.
Kwesbare kruisings in die area word tans deur metropolisielede beman en die brandweer staan gereed vir enige moontlike noodgevalle.
Leave a Reply
You must be logged in to post a comment.