Boerehaat en die DA

In die aanloop tot mev. Zille se verkiesing as leidster van dié party is daar berig oor die konflik tussen haar en mnr. Theuns Botha wat die Wes-Kaapse leier is en steun onder Afrikaners en Afrikaanse bruinmense geniet. In die lig van Hill se sms, wil dit voorkom asof dié geskil nie bloot persoonlikhede betrek nie, maar spruit uit dieper taal- en etniese verdelings binne die party.

Dit is algemene kennis dat die Demokratiese Alliansie onder Engelse beheer staan. Tewens, in die pas afgelope leiersverkiesing het nie een Afrikaanse kandidaat hom beskikbaar gestel nie. Kandidaatlyste, asook die partybestuur, word deur Engelssprekendes oorheers.

Nietemin het die uitgaande leier, mnr. Tony Leon, in ‘n onderhoud op KykNET erken dat die meerderheid DA-kiesers Afrikaners is. In ‘n hoë mate verteenwoordig die DA dus die Afrikaner se politieke aspirasies.

Dit laat voorwaar ‘n wrang smaak in die mond as die DA bereid is om sulke openlike anti-Afrikaanse gevoelens in sy geledere te duld.

‘n Meer grondliggende vraag is of Afrikanersteun langer geregverdig sou wees vir ‘n party waarvan die etos, beheer en teenwoordigheid van Boerehatende ryksarende soos Pat Hill allermins met Afrikanerskap strook.

Daar sal indringend oor die Afrikaner se politieke toekoms besin moet word en of daar hoegenaamd nog plek vir hom binne die DA onder mev. Zille is.