China sal greep op Thailand versterk na koning se dood

Koning Bhoemibol Adoeljadej (88) van Thailand wat Donderdag oorlede is, se dood sal China se greep op die land versterk.

Die koning was die wêreld se langs regerende monarg wat langer as 70 jaar aan bewind was nadat hy die troon op 9 Junie 1946 bestyg het.

Thailand het tydens sy bewind tien militêre staatsgrepe, die laaste een in Mei 2014, beleef.

Bhoemibol, ‘n figuur van eenheid, se nalatenskap rus op die leier van die mees onlangse staatsgreep, premier Praioeth Tsjanotsja.

Die Thaise premier, wat simpatiek is teenoor China, het aangekondig dat kroonprins Maha Vajiralongkorn (64) die koning sal opvolg.