Kei-pas deur rotsvalle versper

Groot rotse het op die Kei-pas op die N2  in die Oos-Kaap geval weens swaar reën, het die Arrive Alive-veldtog Dinsdag gesê.

Tshepo Machaya, ’n woordvoerder van Arrive Alive, het motoriste versoek om uiters versigtig te bestuur op die pas tussen Butterworth en Oos-Londen.

Machaya het gesê groot rotse wat reeds op die pad geval het, vertraag verkeer in die omgewing.

“Ons is besig om reëlings te tref dat opruimingswerk kan begin sodat verkeer weer vrylik kan beweeg,” het hy gesê.

’n Vragmotor het Maandag olie gestort in die Mtentu-gebied tussen Mthatha en Dutywa op die N2 en ’n aantal motors het in die reënweer omgeslaan.

Drie mense is ook in ongelukke in die gebied beseer. – Sapa