Skrywer: Dan Roodt
Nege renosterstropers vas
Nege mans is in hegtenis geneem nadat hulle glo die afgelope paar weke renosters in Limpopo gestroop het, het die polisie Woensdag gesê.
In die mees onlangse voorval is vier verdagtes in hegtenis geneem terwyl hulle glo op pad was om renosters by ‘n wildreservaat naby Lephalale te skiet, het lt. Kol. Ronel Otto gesê.
Die mans is Dinsdag by ‘n padversperring naby Vaalwater vasgekeer.
Dié vier mans, drie van Zimbabwe en een van Mosambiek, sal Donderdag in die landdroshof verskyn.
Vyf mans is drie weke terug, in ‘n aparte voorval, in hegtenis geneem nadat hulle renosters op ‘n wildreservaat wou stroop.
Die mans, almal van Zimbabwe, het reeds in die hof verskyn.
Hulle saak is tot Augustus uitgestel.
Volgens Otto is daar ‘n moontlikheid dat dié mans ook betrokke was by voorvalle van huisrowery.
Naamsveranderings kom in Kaapstad
Naamsveranderings vóór die komende munisipale verkiesings in die Moederstad is amptelik Woensdag op die maandelikse stadsraadsvergadering aangekondig deur Dan Plato.
Die DA gaan die naamsveranderingsproses in Kaapstad steun, ten spyte van groot teenkanting uit Afrikanergeledere.
Peter Gabriel, ANC-hoofsweep in die stadsraad, het aan Plato, burgemeester, gevra wanneer straatname gaan verander.
Plato wil die veranderings glo finaliseer voor die plaaslike verkiesings. “Ons weet presies in watter rigting ons gaan,” het hy aan die Burger gesê.
Alhoewel Plato meen die kwessie moet nie “as ‘n speelbal van verkiesingspolitiek gebruik word nie”, het hy ‘n spesiale taakspan onder leiding van Owen Kinahan aangestel om die koste van die naamsveranderinge sowel as die rol wat die publiek gaan speel, te ondersoek.
Van die voorstelle sluit in dat Andries Pretoriusstraat verander word na Orangestraat, Coen Steytlerlaan na Walter Sisululaan, De Waal-rylaan na Phillip Kgosana-rylaan, D.F. Malanstraat na David Poole-straat, Frans Conradie-rylaan na Acrestraat, Hans Strijdomlaan na Albert Luthuli-laan, Hendrik Verwoerd-rylaan na Beyers Naudé-rylaan, Hertzog Boulevard na Nelson Mandela Boulevard, Jan Smutsstraat in Athlone na Dullah Omar-rylaan en Jan Smutsrylaan in Simonstad na Fred Carneson-rylaan, Oswald Pirowstraat na Christiaan Barnard-rylaan en Nico Malanstraat na David Rabkinstraat.
Geen oorlewendes in Pakistanse lugramp
Al 152 passasiers en bemanningslede wat aan boord die vliegtuig was wat Woensdag naby Islamabad, Pakistan se hoofstad, neergestort het, is dood, het ‘n beampte gesê.
Twee Amerikaners was onder die slagoffers, het ‘n woordvoerder van die Amerikaanse ambassade gesê. Hy het geen verdere besonderhede gehad nie.
“Daar is geen oorlewendes nie. Ons glo almal is dood. Ons is besig om die oorskot van die lyke uit die wrak te haal,” het Imtiaz Elahi gesê.
Staatsamptenare staak
Sowat 200 000 lede van die Vereniging van Staatsamptenare (PSA) het Donderdag regoor die land begin staak in ‘n poging om beter lone af te dwing.
Daar sal na verwagting landswye optogte plaasvind terwyl Richard Baloyi, minister van staatsdiens en openbare administrasie, verder met vakbondleiers sal vergader.
Staatsamptenare dring aan op ‘n 8.6%-loonverhoging sowel as ‘n behuisingstoelaag van R1000, wat terugbetaalbaar moet wees tot 1 April vanjaar.
Die regering het ‘n 6,5%-loonverhoging en ‘n behuisingstoelaag van R620 aangebied, terugbetaalbaar tot 1 Julie vanjaar.
Volgens Koos Kruger, Kaapstad se bestuurder van PSA sal werkers wat in ‘sleutelposte’ aangestel is, nie aan die staking deelneem nie.
Die Suid-Afrikaanse Demokratiese Onderwysersunie (Sadtu) het ook ‘n beroep op sy lede gedoen om nie te staak nie.
Die Soustrein
“Wie de ongeluk dryf dié ding?”
So wil groot kokkedoor Zoempie weet wat pas van sy baie duur whiskey op sy baie duur pak klere se broek gemors het. Nogal strategies ook, sodat dit verdag baie lyk of hy ‘n glipsie gehad het.
“Dis ‘n êppie pas uit die treindryfkollege. Sy het die beste punte behaal,” verduidelik die Minister van “Vervoer.”
“Maar het sy genoeg ondervinding om die soustrein te dryf,” wil Zoempie steeds verontwaardig weet terwyl hy verwoed met die servet vee om die verleentheid op te droog.
“Ondervinding? Wat is dit?” wil die Minister van “Arbeid” verbaas weet.
Intussen wieg die vyfster op wiele weer rustig, terwyl dit sy reis na Utopia voortsit. Dit vleg deur verlate, rommelbestrooide stasies, ermbarmlike plakkerskampe, kinders wat langs die spoor bakhand staan….
Dis regtig ‘n unieke trein. Die vensters is dig getint – nie net sodat die mense van buite nie kan insien nie, maar die passasiers binne ook nie kan uitkyk nie. Die vorige groot kokkedoor het die weerskante toe tintwerk laat doen sodat daar nie armoede is nie.
Vir deursigtigheid is daar oral kameras, sodat die groot kokkedore se doen en late vasgelê kan word en die publiek dit op hul TV’s kan kyk. Ter wille van deursigtigheid.
Terwyl Zoempie so verwoed strategies vryf, sien hy ‘n kamera is ook op hom gefokus, of liewer, daar waar dit so prominent is.
“Plak toe daai kamera!” beveel hy. ‘n Paar lakeie spring vervaard om te gaan plak. Gewoonlik praat Zoempie net, maar af en toe bedoel hy ook wat hy sê. Dis nou sulke tyd.
Heelparty van die kameras is al toegeplak. Trouens, die manne en vroue om die lang stinkhouttafel is juis besig om ‘n resolusie op te stel wat die ander kameras ook sal laat toeplak.
“Siejy so winde laat!” raas die Minister van “Verdediging.”
“Maar dit is dan ‘n stinkhouttafel!” verweer die Minister van “Omgewingsake” verward.
“Net te veel dinge kom op die lappe wat ‘n stok in die soustreinwiele se speke kan steek,” kla Zoempie.
“Het die trein se wiele dan speke?” wil die Minister van “Onderwys” verbaas weet, en begin verwoed die naaste venster optrek om uit te kan kyk.
“My eie rekord is so blink soos my kop,” sê Zoempie, maar ek is bekommerd oor van julle ander. Ek kan nie aanhou gate toestop nie.”
“Is daar dan nog gaatjies wat vol geld gestop kan word?” vra die Minister van Uitgawes op Luukshede.
“Kyk, ek het my goed genoeg laat cover maar ek is bekommerd van julle gaan in die k*k beland,” vervat Zoempie.
‘n Vreeslike vrees pak die lotjie om die stinkhouttafel beet. Hulle is benoud en die Minister van “Verdediging” raas nou erg: “Nee sies, stinkhout beteken nie julle moet almal van benoudheid po*p nie!”
“Generaal, generaal, sal jy ons kan red?” kerm die lot. Die Minister van Propaganda skuif sy tenderdokumente eenkant en antwoord: “Vir wat kerm julle, sit aan die TV en kyk, dis klaar gedoen.”
“Maar gaan die vyand nie uitvind nie?”
Zoempie brom: “Die opponente ry almal in die dog box. Ons weerhou eenvoudig die inligting van die plekke waar hulle insae kry.”
Die Minister van “Verdediging” giggel. “Ek doen dit al lankal.”
“Aaa, vars lug,” sug die Minister van “Verdediging” verlig toe die Minister van “Onderwys” wat steeds die venster probeer opskuif het, met haar elmboë oplaas twee gate in die ruit druk.
“Volgende punt op die agenda” sê Zoempie. “Herontplooiing.”
“Wie gaan herontplooi word,” vra die Minister van “Grondhervorming” benoud.
“Nie julle nie, man, kaders wat uitgevang is. Skelm kaders, onbevoegde kaders… ‘n Ongemaklike lot van hulle word nou deur allerlei prosesse uit hul geveerde nessies gehaal.”
“Ek hersirkuleer hulle al lankal,” sê die Minister van Plaaslike “Regering.” “Word hulle hier uitgevang, skuif ek hulle gewoon na ‘n ander plek. Ek het al ‘n hele taakspan wat bestaan uit uitgevangdes om my hiermee by te staan.”
“My probleem is dat sommige van julle al van die kaders die plank van die soustrein af laat loop het. Nie alleen is hulle maatjies van die ander maatjies nie, maar hulle stel die vreeslikste eise in, en naderhand sal ons die glase nie meer so vol kan gooi nie.”
“Dan sal mens ook nie meer so mors as die êppie die trein so bietjie rof dryf nie,” brom die Minister van “Vervoer.”
“Wat hoor ek?” wil Zoempie weet.
“Nee, sommer niks krabbel die Minister terug.
“Ek stel voor ons hersien die Ministeriële herontplooingskomitee sodat die linkerhand soms weet wat die linkerhand doen,” stel die Minister van “Arbeid” voor.
Almal knik koppe. Daar is nou al soveel sulke komitees. Soos die een teen korrupsie, maar daar mag nie hardop hiervan gepraat word nie.
“Volgende op die agenda: Dienslewering.”
“Ek dink nie die item hoef bespreek te word nie. Dienslewering is puik. Ek hoef net my vingers te klap en die kelner maak weer my glas vol,” sê die Minister van Sports en Leeglê.
Almal stem saam.
Die agenda begin einde se kant toe staan.
“Wanneer kom ons by Utopia aan?” wil Zoempie weet.
Die Minister van “Vervoer” kyk hom verbysterd aan: “Aankom? Ons ry dan daarop. Hier is ‘n luukse wa vir vrou 2 en3, en ‘n semi-luukse vir vrou 1. Met personeel.”
Zoempie glimlag breed, en vergeet van die nat kol op sy broek.
“Die vergadering is verdaag,” sê hy.
SA moet kennis neem van nuwe Yslandse wetgewing
“Ons doen ‘n dringende beroep op die ANC om kennis te neem van die nuwe mediawetgewing in Ysland,” vra ds. Theunis Botha, leier van die Christen-Demokratiese Party (CDP) en waarnemende voorsitter van die Christen-Demokratiese alliansie.
“Ysland het die teenoorgestelde koers ingeslaan as wat die ANC nou in die parlement probeer inslaan. Deur die nuwe Yslandse wetgewing, wat deur die ModerneYslandse Media-inisiatief gedryf is, sal die bronne van ondersoekende joernaliste effektief beskerm word en skoon adminitrasie verseker word. Die media beskryf hierdie wetgewing as ‘n gids vir persvryheid.
“Selfs voor die jongste verwikkelings het Ysland reeds die 9de plek op Verslaggewers Sonder Grense se persvryheidsindeks beklee, en Suid-Afrika die 33ste – na lande soos Ghana en Mali.
“‘n Land se posisie op die persvryheidsindeks beïnvloed die land se posisie op die korrupsiepersepsie-indeks en beïnvloed so weer beleggersertroue.”
Bulgevegverbod beklemtoon Katalonië se eie identiteit
Die plaaslike parlement in Katalonië sal Woensdag stem oor die verbod op bulgevegte in dié noord-oostelike streek van Spanje.
Katalonië is die tuiste van Barcelona, Spanje se tweede grootste stad.
Die parlement stem oor dié kwessie nadat diereregte-aktiviste ‘n veldtog geloods het en 180 000 handtekeninge in Katalonië met ‘n petisie ingesamel het.
Daar is onlangs aangedui dat ‘n meerderheid van 135 wetgewers saamstem dat Katalonië se wet oor dierebeskerming verbeter word sodat bulle tydens die gevegte nie mishandel of doodgemaak word nie.
Indien dit goedgekeur word, sal Katalonië die eerste streek in die land, buite die Kanariese Eilande, word om bulgevegte te verbied.
Bulgevegte is in 1991 in die Kanariese Eilande onwettig verklaar.
Alhoewel die argumente wat die verbod ondersteun op dierebeskerming fokus, glo talle in die res van Spanje dat die behoefte om dit te verbied, verband hou met Katalonië se begeerte om hul eie identiteit te beklemtoon.
Werkloosheid styg
Die amptelike werkloosheidskoers het van 25,2% in die eerste kwartaal tot 25,3% in die tweede kwartaal gestyg met 61 000 werkgeleenthede wat verlore is.
Suid-Afrika het volgens Statistieke Suid-Afrika (SSA) se arbeidsmagpeiling altesaam 1,102 miljoen poste verloor sedert begin verlede jaar – 870 000 in 2009, ‘n bykomende 171 000 in die eerste kwartaal en die jongste 61 000 poste in die tweede kwartaal.
Die werklike werkloosheidskoers het in die tweede kwartaal egter gestyg van net onder 40% tot 41%, volgens die Buro vir Marknavorsing aan Unisa. Die Buro gebruik uitsetsyfers in die verskillende ekonomiese sektore om werkloosheid te meet.
Prof. Carel van Aardt, direkteur van die Buro sê die Amps-syfers (wat deur die advertensiebedryf vir bemarking gebruik word) wys dat die werkloosheidsyfer nóg hoër is, op 63%.
Veral werkloosheid onder jeugdiges het in dié kwartaal tot meer as 50% gestyg na 51,3% in die ouderdomsgroep 15 tot 24 jaar.
Alhoewel die formele sektor 129 000 poste verloor het , het die informele sektor 5,7% meer mense in diens geneem, wat 115 000 poste beteken.
Landbou het met 32 000 werkgeleenthede prysgegee en werkgeleenthede in privaathuishoudings het met 14 000 gedaal.
Van Aardt het aan Sake24 gesê die groei in die informele sektor is eintlik net mense wat ‘n ekonomiese aktiwiteit noodgedwonge moet aanpak om te probeer oorleef.
Fifa-amptenaar geskiet
Die hoof- finansiële amptenaar van Fifa se plaaslike komitee is buite sy huis in Sandton, Johannesburg, geskiet.
Farouk Seedat (52) is na ‘n hospitaal gehaas nadat hy rondom 22:00 Dinsdagaand by sy huis deur gewapende mans aangeval is.
Dit is nie bekend of enigiets tydens die aanval gesteel is nie maar Kym Cloete, polisiewoordvoerder, sê ‘n saak van poging tot moord en huisbraak is gemaak.
Volgens ‘n woordvoerder vir die hospitaal waar Seedat opgeneem is, verkeer hy in ‘n stabiele toestand.