praag.co.za

Tag: Covid-19

  • TLU SA misnoeg oor kwart-miljard rand betalings aan SAFDA

    TLU SA misnoeg oor kwart-miljard rand betalings aan SAFDA

    TLU SA neem met misnoeë kennis van bewyse dat die departement van landbou, grondhervorming en landelike ontwikkeling oor die afgelope vyf jaar meer as ‘n R246 miljoen aan die South African Farmers Development Association (SAFDA) gegee het.

    Volgens ‘n parlementêre antwoord aan die DA het minister Thoko Didiza gesê haar departement het R246 664 290 aan SAFDA betaal, maar daar is geen duidelikheid oor hoe en hoe suksesvol die besteding hiervan is nie. Die ooreenkoms tussen die twee partye bevat verder ‘n vertroulikheidsklousule, wat nog meer vrae laat ontstaan oor waarvoor hierdie openbare fondse aangewend is.

    “Ons is redelik oortuig dat die gemeenskappe wat veronderstel was om deur hierdie fondse bevoordeel te word, geensins beter daaraan toe is nie,” sê mnr. Henry Geldenhuys, die president van TLU SA. “Soos met die finansiële hulp wat die regering aan die begin van die COVID-19-pandemie aan klein boere uitbetaal het, is dit duidelik dat dié wat die fondse toeken geen insig in die voedselvoorsiening van Suid-Afrika het nie. Hierdie boere voorsien maar 3% van die nasionale aanvraag na voedsel. Deur die grootste finansiële ondersteuning aan hierdie groepe en bestaansboere te gee, help geensins om die 68% verstedelikte bevolking van kos te voorsien nie.”

    Dit is vir TLU SA duidelik dat hierdie tipe hulpverlening bloot ‘n poging is om mense afhanklik te hou van die staat. Dit is nie volhoubaar nie en gaan niemand op die lang duur bemagtig nie.

    “Ons verwag dat die regering ernstig moet besin oor die toekoms van die land,” sê mnr. Geldenhuys. “Die regering is besig om al hoe verder van moontlike oplossings af weg te beweeg. Die inwoners van die land begin ook al hoe meer besef dat daar binne die beleidsraamwerk van die ANC nie oplossings is nie. Gemeenskappe sal al hoe meer hulle eie omstandighede vir die toekoms moet skep.”

  • Dan Roodt: Waarom ek nie die inspuiting wil hê nie

    Dan Roodt: Waarom ek nie die inspuiting wil hê nie

    ‘Spuit in, druk geld, sensureer en beheer mense met vrees en stigmatisering. Dis blykbaar die Groot Plan,’ skryf Dan Roodt

    Toe ek ‘n student was, het ek nogal in heelwat argumente met mediese studente betrokke geraak. Ek het hulle probeer oortuig dat hulle manier van kyk na die wêreld, of dan hulle wêreldbeskouing, net een tussen ander was. Vandag het hulle almal egter groot viertrekvoertuie en vakansiehuise by Plettenbergbaai of Hermanus terwyl ek steeds ‘n arm skrywer/kunstenaar/denker gebly het. Want dokters skryf mos medisyne voor en maak saam met die farmaseutiese maatskappye geld daaruit, amper soveel soos Nigeriese dwelmhandelaars uit dwelms.

    Intussen is toordoktery of, meer polities korrek, “tradisionele geneeskunde”, kragtens wetgewing in ons land tot wetenskap verhef. Die twee is gelykgestel. Dit bevestig so min of meer die “epistemologiese anargisme” van my gunstelingfilososoof van destyds, Paul Feyerabend. Hy het geskryf dat die wetenskap “maar net een feëverhaal” tussen ander is. Baie van wat ons nou beleef, is inderdaad soos ‘n feëverhaal, of ‘n wetenskapfiksienagmerrie.

    Nou is my eerste vraag: as “tradisionele geneeskunde” so wonderlik is as wat die ANC en vele linkse denkers in ons land beweer, waarom moet ons inentings teen korona uit Westerse lande invoer?

    My tweede en derde vrae is: Vertrou u die ANC? Asook: Vertrou u vir Pfizer, AstraZeneca en Johnson & Johnson?

    Al die joernaliste (of hoernaliste soos ek hulle noem) sal hierdie vrae luidkeels met krete van “Jaaaa!” beantwoord, maar dan het hulle hulle nog nooit verdiep in die geskiedenis van die mensdom en veral die wetenskap nie.

    Ons weet ook dat hier belange, sowel finansieel as polities, op die spel is. En die media, die “hoofstroommedia” of HSM soos hulle deesdae genoem word, dien altyd iemand se belang. Hulle maak propaganda vir iets of iemand. Soos byvoorbeeld die groot farmaseutiese maatskappye. Of Brittanje. Of Bill Gates en Georges Soros. Regstreeks of onregstreeks.

    Daarom, ongeag al die probleme rondom die sogenaamde “inentings” – wat afwyk van die tradisionele definisie van ‘n inenting – verkondig al wat ‘n koerant of ‘n HSM-webblad is dat jy jou so gou moontlik moet laat inspuit. Maak nie saak waarmee nie, want lyk my enige middel is goed genoeg, solank een of ander Groot Farmaseutiese Maatskappy dit beskikbaar stel.

    Mense is skape, word daar dikwels gesê. Van nature is hulle daartoe geneig om te konformeer en om te doen wat die groep doen. Daar is mense soos ek wat so half stroomop is, dinge bevraagteken en bewyse wil sien, maar ‘n mens betaal ‘n duur prys daarvoor want die skape en die konformiste wil jou daarvoor op die brandstapel sit. Of as daar nie ‘n brandstapel beskikbaar is, jou ten minste brandmerk of “kanselleer” soos dit tans heet.

    Een van die mees patetiese onlangse skrywes in Afrikaans is dié van Koos Kombuis, wat hom jare lank as ‘n linkse hippie of “kunstenaar” voorgedoen het. Hy is steeds in opstand teen PW Botha en een of ander gewaande “konserwatiewe kultuur” van die sewentigerjare, maar as dit by die Inspuiting kom, staan hy eerste in die ry. Trouens, al klagte wat hy het, is dat hy nié eerste in die ry kan wees sodat sy genetika deur Pfizer of Johnson en Johnson permanent verander kan word nie. Koos Kombuis: En eindelik kry ek toe my steek. Sy steek, nogal. Dis seker ‘n Naspersgrappie. Miskien moet hy eerder sy verhoognaam na Koos Konformis verander. Dermate dat hy jags was vir die inspuiting, om nou by die platvloerse humor van die Naspers- en Netwerk24-hoernaliste te hou.

    Daar is verskeie moderne omskrywings van wetenskap, maar ‘n gangbare een is: ‘n Teorie of hipotese wat reg of verkeerd bewys kan word. As iets “net reg” is, soos godsdiens of dalk toordoktery, dan is dit nie wetenskap nie. Dis waarom Galileo en die Pous so vasgesit het toe eersgenoemde gesê het dat die aarde om die son draai. Op die ouderdom van 69 moes Galileo Galilei op sy knieë gaan en die gedagte dat die aarde om die son draai “afsweer, vervloek en verafsku” en elke dag sewe psalms opsê. Ook is alles wat hy ooit geskryf het, op die Indeks van verbode boeke geplaas.

    Sowel die uitvinder van die PCR-toets, Kary Mullis, as die uitvinder van die boodskapper-RNS-metode, Robert Malone, het ernstige bedenkinge oor dít wat tans aan die gang is sover dit die intentings betref. Ons weet ook dat geen van die middels wat nou by die miljoene dwarsoor die wêreld toegedien word, aan die normale proses van kliniese beoordeling deur die FDA in die VSA onderwerp is nie. Ons eie Mediese Navorsingsraad is deesdae so hopeloos “getransformeer” dat ‘n mens wonder of hulle gebore daartoe in staat is om enige ingewikkelde middel wetenskaplik te kan toets en beoordeel.

    Laas het die tannie van die Suid-Afrikaanse Mediese Vereniging, dr. Angelique Coetzee, haar nog vrek gelag toe mense haar oor ivermektien uitvra. Sy het te kenne gegee dat ivermektien ‘n absurde bygeloof was, of iets na aan toordoktery. Ekskuus, “tradisionele genesing”. (En moet my nou asseblief nie weer aankla omdat ek dit waag om die woord “toordoktery” te gebruik nie.) Tans geniet ivermektien wêreldwyd ‘n toenemende reputasie as ‘n middel wat die virale lading van ‘n pasiënt tydens Covid-19 kan laat afneem, soos wat ‘n Israelse studie ‘n maand of twee gelede bevind het.

    Op 6 April 2021, Van Riebeeckdag, het die Hooggeregshof in Pretoria die minister van gesondheid, asook die Suid-Afrikaanse gesondheidsprodukte-owerheid, beveel om die gebruik van ivermektien by die behandeling van Covid-19 toe te laat.

    In Desember 2020 nog het die mediese skool van die Universiteit van Pennsilwanië in die VSA alle gepubliseerde mediese navorsing oor die boodskapper-RNS-inentings in oënskou geneem en tot die volgende gevolgtrekking gekom:

    “The current evidence base on messenger RNA (mRNA) vaccines is made up entirely of small early-stage trials, nearly all of which examined only short-term outcomes. They lack sufficient power for testing the statistical significance of most results, and for assessing the risk of serious but uncommon adverse events.”

    Self gaan ek my nie laat inspuit nie, omdat ek nóg die ANC nóg die farmaseutiese maatskappye vertrou. Ek sal eers wag dat daar behoorlike kliniese toetse op die middels gedoen word en die kat uit die boom uitkyk.

    Behalwe die pro-farmaseutiese propaganda wat die hoernaliste elke dag opdis, is dit belangrik om ook van die teenargument kennis te neem. Die webblad nojabforme.info bevat inligting en nuus in 39 tale rondom die inspuitings, asook die koronavirus.

    Ek wil nie aan enigeen voorskryf om die inspuiting te kry of nie te kry nie. Hoewel ek ouer as 60 is, weier ek self om enige inspuiting te ontvang en as ek daartoe gedwing word, sal ek my daarteen verset. As ‘n mens nie meer mag vlieg of openbare plekke mag besoek as jy nie ingespuit is nie, sal ek maar net met Jan Tuisbly se karretjie ry, soos wat ek in elk geval reeds doen.

    Noorweë het reeds besluit om alle inentings met die virale vektor van Johnson en Johnson te staak en wil hul oorblywende voorraad aan Afrika, waaronder Suid-Afrika, verkoop. Dit veroorsaak te veel bloedklonte.

    Sommige mense beskou die tipe inspuitings wat tans toegedien word as biologiese wapens omdat dit elke sel in jou liggaam binnedring en heel moontlik jou immuunstelsel permanent verander. Die langtermyngevolge daarvan is nog nie verreken nie; almal wil net hê “die ekonomie moet weer werk” en hulle wil weer kroeg toe of restaurant toe kan gaan.

    Terloops, iemand vertel my gister dat al die restaurante by die Cresta-winkelsentrum in Johannesburg gesluit is, maar mens kan steeds wegneemetes daar verkry. Nou loop almal in die sentrum en selfs in die winkels rond terwyl hulle eet – sonder maskers. Die hele Cresta is nou een groot restaurant. Hoe beperk dit die virus se verspreiding, wonder ‘n mens?

    ‘n Klomp van die maatreëls en optrede wat tans aan die gang is, is geheel en al absurd.

    Die ekonomie gaan ook nie “net weer werk nie”, want die sentrale banke druk al van 1998 af aanmekaar geld om ‘n ineenstorting van die aandelebeurse te verhoed, met die gevolg dat die rykes ryker word en die armes armer. In dié opsig bevoordeel Covid-19 vir Jeff Bizos, Elon Musk, Bernard Arnault, Bill Gates en Mark Zuckerberg, die vyf rykste mense ter wêreld, want hulle aandele styg gedurig terwyl gewone mense verarm. En die sentrale banke hou aan geld pomp om die beurse nog hoër te druk.

    Spuit in, druk geld, sensureer en beheer mense met vrees en stigmatisering. Dis blykbaar die Groot Plan.

    Dr. Maré Olivier van Kuilsrivier in die Kaap wat dit gewaag het om mense op Facebook aan te raai om ‘n “ingeligte besluit” aangaande inspuitings te neem, word nou gedreig dat sy by die Mediese Raad aangekla kan word want sy het dit gedurf waag om die alwysheid van die farmaseutiese reuse te bevraagteken.

    Selfs as jy ‘n mediese dokter is, mag jy nie ‘n mening oor die inspuitings uitspreek of selfs net vra dat mense behoorlik daaroor nadink nie.

    Miskien werk jy met mense en loop jy die risiko om aan Covid-19 blootgestel te word. En jy voel oortuig deur die beperkte kliniese studies wat daar tot dusver op dié middels gedoen is. Dan is die inspuiting dalk reg vir jou.

    Maar as jy in staat is om groot groepe mense te vermy, van die huis af werk en glo dat jou immuniteit goed is, waarom dan die risiko en moontlike langtermyngevolge van ‘n inspuiting neem?

    Ek mag verkeerd wees, maar persoonlik voel ek dat my immuniteit goed is. Ek rook nie, drink nie en eet meer vars vrugte en groente in een week as die meeste mense in ‘n jaar. Ook pampoenpitte vir sink en ‘n wye verskeidenheid ander voedselsoorte. So een keer per jaar kry ek dalk verkoue maar herstel gewoonlik binne ‘n dag of twee daarvan sonder dat ek enige medikasie hoef te neem. My liggaamsmassa-indeks is presies waar hy moet wees, rondom ‘n 22, dus is ek nie te vet of te maer nie.

    Negentig persent van mense wat aan Covid-19 sterf, is oorgewig. Eers het jy op McDonald en Cadbury vertrou, nou plaas jy jou hoop op Pfizer. Sterkte daarmee.

    Die rol van dieet in al ons moderne gesondheidsprobleme word totaal onderskat. Die meeste dokters weet ook nie veel daarvan af nie, want dieetkunde is nie deel van die gemiddelde mediese kursus nie. Die voedselbedryf en die mediese bedryf teer op mense se versugtinge na gemorskos: een verkoop die kos en die ander die middels wat veronderstel is om die gevolge daarvan te behandel. Dus kan mens sowel McDonald as Pfizer in jou aandeleportefeulje hê. Hoewel, ten spyte van korona styg Pfizer se aandeelprys nie eintlik nie. ‘n Mens wonder hoekom? Miskien weet die beleggers iets wat ons nie weet nie.

    Selfs al doen ek korona op, dink ek nie die virus gaan my doodmaak nie. Ek sal dit eerder vermy om die virus onder lede te kry as om my doelbewus met die pylproteïen (spike protein) deur middel van ‘n inspuiting te besmet. Ek verkies géén virus in my liggaam nie: nóg Covid-19, nóg Pfizer, Moderna, Johnson en Johnson of AstraZeneca of wie ook al se mensgemaakte “gesonder” virusse.

    Dr. Robert Malone, wat as jong navorser in die 1980’s by die Salk-laboratorium eintlik die wetenskaplike deurbraak gemaak het wat nou deur die farmaseutiese maatskappye gebruik word om pylproteïen na jou selle oor te dra, verduidelik in hierdie video waarom die huidige inspuitings gevaarlik kan wees. Kyk daarna, en maak ‘n ingeligte besluit.

    Kyk na die argiefkopie van die onderhoud (2021)

  • Sydney Gregan: Helen Zille se mistasting

    Sydney Gregan: Helen Zille se mistasting

    Helen Zille skryf op 11 Augustus op politicsweb onder die opskrif “Why South Africa became a Criminal State” dat indien ons ooit wil verstaan hoe die ANC ‘n “plundermasjien” geword het, mens eers moet verstaan hoe dinge saamgestel was.

    Die hutsmerk #VoetsekANC som die gevoel op van waarskynlik derduisende denkende kiesers in hierdie land wat (uiteindelik) insien dat die ANC eintlik maar net een doel het en dis om alles voor die voet in te palm (en te verorber) waarop hulle hulle hande kan lê. Hulle voel vir die mense van hierdie land niks. Begrippe soos demokrasie en menseregte word net gebruik om die wêreld te flous terwyl ANC-kaders elke dag kyk wat daar nog oor is om te plunder.

    Seker die finale bewys dat die ANC ‘n veer voel vir die land is die strooptog met Covid-19-fondse terwyl werkloosheid en gepaardgaande armoede toeneem en ‘n hongersnood dreig. Ace Magashule het boonop die onmoontlike vermag deur vir Jacob Zuma verby te steek as die mees haatlike figuur in die land met ‘n vermetelheid wat net geen perke ken nie. Byna uitdagend het hy gestel dat daar niks fout is daarmee dat sy seun die “tender” vir maskers en seep by die Vrystaatse provinsiale regering gekry het (net om onmiddellik ‘n BMW van R2 miljoen aan te koop) nie.

    Die korrupsie oor 26 jaar beloop miljarde rande en die einde is nie in sig nie. Wat die situasie tans baie erger maak is, soos Zille dit stel:

    “the callousness of looting donor funds provided to protect people from a potentially deadly illness, reflects the extent of the ANC’s moral depravity”.

    Hoe het dit dan in 26 jaar ontvou tot by hierdie toestand? Wel, te midde van ‘n grondwet wat beskou is as die “mees gevorderde” ter wêreld en die pretensie van ‘n “reënboognasie”, is die realiteit dat ons regeer word deur ‘n klomp kriminele wat juis die wette van hierdie land gebruik het om hulleself te verryk.

    Die ANC het, soos Zille tereg daarop wys, korrupsie gewettig. Hulle het dit openlik onder almal se neuse gedoen met die steun van die liberale pers en met ekonome en maatskappye wat maar net te gretig was om self in die buit (of die krummels wat rondval) te deel. Zille stel dit prontuit:

    “What’s more, these institutions not only failed to protect us. They actually facilitated this downward trajectory.”

    “Broad-Based Black Economic Empowerment” (BBBEE), soos gekonseptualiseer en geïmplimenteer deur die ANC (met die steun van die liberale pers en groot geld) het korrupsie gewettig en moreel aanvaarbaar gemaak. Teenstanders daarvan is as rassiste uitgekryt dog is die waarheid dat meer as 100 wette hierdie monster in ons samelewing ingevoer het onder die dekmantel van “rasseverteenwoordigendheid” terwyl die ANC dit gebruik het om sy kaders oral te ontplooi.

    Heel gepas stel Zille dit soos volg:

    “The factions in the ANC are not driven primarily by political or ideological differences, but by intense contestation for control over these funding sources. After 26 years, the South African state has become a web of competing criminal syndicates, posing as a government.”

    Kiesers is verkiesing na verkiesing vir die gek gehou om te glo dat swartes deur BBBEE “bemagtig” is. Die waarheid is dat dit ‘n ANC-elite so bemagtig het dat dit bykans onmoontlik lyk om die situasie nou reg te stel. Die werkloosheidsyfer kan op 50% staan na die Covid-19 fiasko en derduisende besighede moes sluit terwyl die vetkatte van die ANC eenvoudig meedoënloos voortgegaan het met drakoniese en waansinnige maatreëls wat nooit bedoel was om “lewens te red” nie, maar veel eerder om hulle verskanste posisies verder te beskerm en te bestendig.

    Soos dr Anthea Jeffery in haar boek The People’s War dit stel (en nou deur Zille bevestig word), het die ANC dit 23 jaar gelede reeds prontuit gestel dat hulle bedoeling met die Nasionaal Demokratiese Revolusie juis staatskaping was.

    Joel Netshitenzhe, ‘n ANC-“intellektueel” het in die ANC-mondstuk Umrabulo, in 1998 geskryf:

    The aim of the NDR “is extending the power of the ‘National Liberation Movement’ over all levers of power: the army, the police, the bureaucracy, intelligence structures, the judiciary, parastatals, and agencies such as regulatory bodies, the public broadcaster, the central bank and so on”.

    Die ANC het dus ANC-partybeheer van die ganse Suid-Afrikaanse staat verkry deur doodeenvoudig BBBEE toe te pas en alle fondse wat beskikbaar geraak het eenvoudig vir hulleself op te eis. Die stryd binne die ANC gaan slegs om beheer oor daardie fondse en nie om die belange van die mense van hierdie land nie.

    Toe die DA die ANC hof toe gevat het oor die toekenning van Covid-19-fondse aan die hand van BBBEE-kriteria moes hulle van die regbank hoor dat die minister nie net geregtig was om dit so te doen nie maar deur die BBBEE-wetgewing verplig was om dit te doen! Hierdie hofuitspraak is finale bewys van die hopelose toestand waarin ons ons nou bevind. En dit word deur wetgewing (gerugsteun deur die grondwet) gemagtig!

    Wat stel Zille voor as oplossing vir hierdie gemors?

    “The only way out of this mess is to understand that no democracy can make sustained economic progress without actively striving to become a meritocracy, where people are appointed to positions, or win tenders, on clear, value-adding criteria, not their colour or their political contacts. And the only way we can get there is if the voters begin to understand why this is so important, and begin to vote for it.

    Otherwise we must stop feigning shock that the looting continues.”

    Ek is bevrees dis juis hier waar Zille as aartsliberalis mistas. Die (meerderheid) kiesers waarvan sy praat wil nie vir die DA stem nie. Daar is vir hulle niks te wen deur vir die DA te stem nie. Hulle wil juis vir die ANC stem in die (vae) hoop dat hulle ook in die buit kan deel. Hoe anders moet mens dit verklaar dat in 26 jaar en te midde van feitlik daaglikse beriggewing van ANC-korrupsie en -vergrype, die meerderheid steeds vir die ANC stem?

    Die realiteit van meerderheidsregering in Afrika is dat ‘n elite hom telkens posisioneer binne die meerderheidsparty en dan sy posisie sodanig verstewig dat dit bykans onmoontlik is om hom uit die kussings te lig. Hier by ons is dit boonop deur wetgewing gedoen wat deur die “edele” grondwet gerugsteun word. Praat van verskans!

    Nee, veel eerder lê die oplossing daarin dat die blanke al sy sake self sal moet bestuur waar hy kan en waar die geleentheid hom in die toekoms voordoen, homself sal moet afskei van die ANC-staat wat met verloop van tyd verder sal verkrummel en uiteindelik in duie sal stort. Want waar die ANC hom lelik gaan misreken is dat die blanke koei net sal aanhou melk lewer. Dit gaan nie gebeur nie. Blankes se geduld gaan opraak soos hulle geld opraak. Nog ‘n ANC-mistasting is dat die geldkraan nie sal opdroog nie. Daardie kraan gaan voor die ANC-vrate se neuse opdroog. Hulle sal, soos elke ander Afrikastaat, nie verstaan waarom dit gebeur nie. Hulle sal waarskynlik ook nie omgee nie en bloot die BMW langs die “stroois” intrek en om die pappot met ‘n deurtrekker gaan kniel en iets oor “apartheid” mompel.

    Ja Helen, wie die lesse van Afrika nie wil leer nie is daartoe verdoem om dit weer en weer te beleef!

  • Munispale werkers dreig om land lam te lê oor salarisverhoging

    Munispale werkers dreig om land lam te lê oor salarisverhoging

    Die munisipale werkersvakbond, Samwu, het in ‘n verklaring te velde getrek teen die nasionale tesourie en dreig opnuut om die land lam te lê met ‘n staking oor salaris-eise.

    Dit staking sal volgens Samwu plaasvind indien munisipaliteite op advies van die tesourie sou afwyk van die meerjarige salaris-ooreenkoms wat bepaal dat munisipale amptenare vanaf 1 Julie 2020 ‘n verhoging van 6,25% sal ontvang.

    Die tesourie het aanbeveel dat munisipaliteite wat weens die onvoorsiene Covid-19-pandemie finansiële druk ervaar, aansoek met doen om vrystelling van die ooreenkoms in terme van ‘n bepaling in die ooreenkoms wat dit moontlik maak.

    Samwu het hierop gewaarsku dat enige sodanige “ inmenging” van die tesourie in munisipale aangeleenthede as ‘n “oorlogsverklaring” beskou sal word. Die feit dat Samwu op hierdie kritieke tydstip onbekostigbare eise op gemeenskappe wil afdwing wat reeds verarm word deur die inperkings, is immoreel en tekenend van ‘n dislojale werkerskorps wat totaal net op hul eie belang ingestel is.

    Die feit dat munisipale infrastruktuur landwyd in duie stort weens hierdie werkers se laksheid en wanbestuur, maak hierdie eise soveel te meer immoreel en sinies.

    Gegewe Samwu se geskiedenis van gewelddadige arbeidsoptrede en die vernietiging van eiendom om hul eise aan owerhede op te dwing, is dit van kritieke belang dat die regering tydige en gepaste stappe neem om ‘n herhaling van sulke optrede te voorkom.

    Samwu het mettertyd en grootliks te wyte aan sy alliansie-verbintenis met die ANC-regering, ‘n destruktiewe greep op plaaslike regering verkry wat ten alle koste verbreek moet word. Die land het reeds te kampe met byna onoorkomelike uitdagings.

    ‘n Gebrek aan gepaste stappe deur die regering, wat die rasionalisering van hierdie opgeblase en dislojale werkerskorps insluit, sal die indruk versterk dat die regering bloot ‘n ruggraatlose marionet is wat gemanipuleer word deur sy alliansie-vennote om hul gevestigde belange ten koste van die Suid-Afrikaanse samelewing te beskerm.

    Bron: Michal Groenewald, VF Plus

  • Brief: Korona is nie Suid-Afrika se eerste virus met politieke gevolge nie

    Brief: Korona is nie Suid-Afrika se eerste virus met politieke gevolge nie

    Op 23 Februarie 2020, het Rapport oor Thabo Mbeki se miv-beleid berig, en dit volksmoord, asook die grootste misdaad teen die mensdom in die geskiedenis van Suid-Afrika genoem. The Economist het moontlik RW Johnson se rubriek in Rapport of ander skrywes oorspronklik in Engels gelees, want dit beskryf die gebeure soos volg:

    In almost every year of the past two decades more than a third of deaths in South Africa have been aids-related. Thabo Mbeki, the president from 1999 to 2008, swallowed a crank theory he found online that the human immunodeficiency virus (hiv) does not cause aids, which it does. He delayed life-saving treatment, cutting short hundreds of thousands of lives.

    Rondom 2013 was ek by Dr Paul Jourdan, outeur van die ANC se SIMS (State Intervention in the Mineral Sector) in sy konsultasiekantoor by die Universiteit van die Witwatersrand. Ons het op die internet gekyk na Statistiek SA se data oor lewensverwagting en sterftes in KZN, vergeleke met die Oos-Kaap, oor die tydperk van President Mbeki sonder miv-medisyne, en daarna tydens President Zuma met miv-medisyne.

    Die data het duidelik gewys dat die Oos-Kaap oor daardie tydperke ‘n tradisie van besnydenis gehad het, en KZN nog nie. KZN se gebrek aan miv-medisyne vanaf president Mbeki het volgens Statisiek SA sigbaar 300 000 mense voortydig in KZN laat sterf.

    Tradisioneel onbesnede bevolkings in KZN se epidemiese dodetalle weens die mi-virus sonder medisyne, was ‘n belangrike rede waarom ‘n KZN-geleide koalisie in die ANC (wat destyds dokter Zweli Mkize ingesluit het), sonder ‘n miljard rand se sake-ondersteuning, suksesvol ‘n partygreep en staatskaping in Polokwane teen Mbeki kon uitvoer.

    Die mi-virus het dus tot die politieke verrassing in Polokwane gelei. Nadat geheime sakegeld die regering weer reggestel het, tref ‘n koronavirus Suid-Afrika se siek ekonomie. Wat is die volgende verrassing?

    Openlike sakeskenkings van ongeveer 3 miljard rand teen die virus se ekonomiese gevolge is nie genoeg om die sakesektor se bewind te stabiliseer, en alle bevolkings te beskerm tydens moontlike toekomstige ekonomiese betogings nie. RW Johnson se IMF-voorspelling gaan waarskynlik waar word, post-COVID-virus.

    Die partyfaksie wat onverwags staatskontrakte verloor het, kyk met belang na hulle aangestelde Openbare Beskermer se appèlaansoek by die hoogste Grondwetlike Hof. As die Hoogste Hof die applaansoek verwerp, sal die  verloorfaksie beweer dat die Konstitusionele Hof soos die Hooggeregshof in Gauteng gekaap is.

    Voeg daarby die Parlement se afdankaksie teen die verloorfaksie se Openbare Beskermer, en Jacob Zuma sal in sy hofsaak getuig dat die Staat nou werklik deur Sakegeld gekaap is, dat die Sake-President, net soos Sake-Parlement en Sake-Howe, Sake se President is, en dat nie staatskaping vir geld nie, maar staatskaping deur geld die oorsaak van die bankrot Suid-Afrikaanse staat met IMF-lening is.

    Soos wat die COVID-virus internasionale sake tussen supermoondhede versuur, sal dit ook ‘n impak op die geskiedenis van Suid-Afrika se bloedjong regstaat he.

    Dat die Reg die Mag volg is reg vir Carl Schmitt, maar as dit in Suid-Afrika openlik deur geld gebeur, naamlik deur Sake se belegging in die belastingvrye CR17-fonds, waarvoor Hooggeregshowe nou saam met die Parlement moet optree teen die Openbare Beskermer, tesame met die IMF wat Sake-President Ramaphosa se komende ekonomiese krisis met markvoorwaardes moet ondersteun, dan gaan ‘n groot politieke verassing weens ‘n virus weer volg.

    —Bert Mouw

     

  • Wonderkuur vir koronavirus van Gilead Sciences?

    Wonderkuur vir koronavirus van Gilead Sciences?

    ‘n Aankondiging gisteraand deur die Amerikaanse farmaseutiese maatskappy wat in virusnavorsing en -medisyne spesialiseer, Gilead Sciences, het ná marksluiting ‘n sprong van drie persent in die S&P 500-indeks veroorsaak, terwyl die maatskappy se eie aandele met 15% boontoe beweeg het. Die maatskappy se middel, remdesivir, wat oorspronklik vir Ebola ontwikkel is, het in ‘n kliniese proefneming in Chicago op 113 ernstige Covid-19-gevalle ‘n wonderbaarlike genesing bewerkstellig sodat slegs 2 uit die 113 oorlede is.

    “Die beste nuus is dat die meeste van ons pasiënte reeds ontslaan is, wat uitstekend is. Ons het net twee pasiënte gehad wat oorlede is,” sê Kathleen Mullane, ‘n spesialis in aansteeklike siekties van die Universiteit van Chicago wat toesig hou oor die remdesivir-toetse by die hospitaal.

    Die aankondiging wat deur ‘n mediese webblad, STAT, in die VSA gepubliseer is, het onmiddellik soos ‘n veldbrand versprei en het oor die afgelope 18 jaar wêreldwye stygings op aandelebeurse veroorsaak. Die meeste Europese beurse het meer as drie persent hoër geopen, met die Londense Footsie 2,33% beter as gister.

    Gilead is ‘n reuse-onderneming wat deel is van die S&P 500-indeks van die 500 grootste Amerikaanse ondernemings. Hoewel dit voorheen kankermedisyne ontwikkel het, spesialiseer dit reeds die afgelope jare slegs in virusnavorsing en antivirale middels, wat onder andere teen MIV en Ebola gemik is. Die maatskappy het reeds ‘n Vigsvoorkomingsmiddel op die mark wat bedoel is vir mense wat “hoë seksuele risiko’s” loop, soos prostitute en homoseksuele. Een van die maatskappy se middels teen die hepatitis-C-virus is vir to $1000 (byna R19000) per pil verkoop. ‘n Kursus van dié medisyne sou die gebruiker $84 000 (byna R1,6 miljoen) uit die sak jaag. In 2018 het Gilead $5,5 miljard netto wins getoon.

    Blykbaar is Gilead met verskeie gelyklopende kliniese proefnemings met remdesivir besig, sowel in Noord-Amerika as in Europa. Totdat dié proefnemings voltooi is, sal daar geen sekerheid oor die middel se doeltreffendheid met betrekking tot Covid-19 wees nie. Verlede maand het president Donald Trump remdesivir voorgehou as een van die middels waarmee Amerika die pandemie sou hokslaan. Toe het die hoofstroommedia dit egter as “praatjies” afgelag.

    Gilead self het egter versigtig op die nuus vanuit Chicago gereageer. “Wat ons op dié stadium kan sê, is dat ons daarna uitsien om die data vanaf huidige studies onder oë te kry sodra dit beskikbaar raak,” het die maatskappy in ‘n verklaring gemeen.

    Die data vanaf die Chicago-proefneming het betrekking op ‘n totaal van 400 ernstige pasiënte en sal binnekort vrygestel word.

    Mullane wou self nie te veel afleidings uit die eerste reeks behandelings maak nie. “Dis altyd moeilik,” sê sy. “Want die ernstige proefneming sluit nie ‘n plasebogroep in om mee te vergelyk nie. Maar dis seker dat toe ons die middel begin gebruik, het die koorskurwes na benede gesak. Koors is nie tans ‘n vereiste vir mense om aan die proefneming deel te neem nie,[maar] as pasiënte wel met hoë koors inkom, sien ons wel dat dit vinnig met die behandeling afneem. Ons het gesien hoe mense binne ‘n dag nadat hulle met die behandeling begin, van die respirators afkom. Dus in daardie opsig, het ons pasiënte alles in ag genome baie goed gedoen.”

    Sy het voortgegaan deur te sê: “Die meeste van ons pasiënte is baie ernstige gevalle en die meeste kon ná ses dae huis toe gaan, dus sê dit vir ons dat die behandeling nie tien dae hoef te duur nie. Ons het baie min wat tot tien dae nodig gehad het, miskien so drie.”

    Indien remdesivir die toets deurstaan en as algemene behandeling vir Covid-19 aanvaar word, behoort Gilead reusewinste te maak. Die Chinese Instituut vir Virologie in Wuhan, die stad waar die virus eerste uitgebreek het, het reeds op 21 Januarie 2020 vir ‘n Chinese “gebruikspatent” aansoek gedoen om die middel in China op Covid-19-pasiënte te mag gebruik.

    Finansiering vir die ontwikkeling van remdesivir is deur die Amerikaanse belastingbetaler voorgeskiet, ten bedrae van $79 miljoen. Gilead het ook ‘n sogenaamde “weeskindmiddel”-status daarvoor op 23 Maart vanjaar verkry. Dié klassifikasie deur die Amerikaanse FDA (Food and Drug Administration) is bedoel vir middels wat deur minder as 200 000 Amerikaners gebruik word en verseker verdere finansiële en wetlike monopoliestatus vir mediese maatskappye, tesame met kwytskelding van belastings en regeringsfooie. Nie net het die Amerikaanse regering dus vir Gilead se middel betaal nie, maar die belastingbetaler loop die risiko om niks van die maatskappy by wyse van belasting terug te ontvang nie.

    Met die styging in koronavirusgevalle in die VSA, lyk dit egter asof meer as 200 000 mense behandeling nodig sal hê. Daarom het die maatskappy teen 25 Maart van die “weeskindmiddel”-status afstand gedoen. Gilead Sciences behou egter patentregte op remdesivir in meer as 70 lande wat sy winste sal verseker.

  • Zimbabwe nou ook op hok

    Zimbabwe nou ook op hok

    Zimbabwe het Maandag met ʼn landswye inperking van 21 dae begin in ʼn poging om verspreiding van die Koronavirus te bekamp. Die president van die land, Emmerson Mnangagwa, het die land op televisie toegespreek en die bevolking aangespoor om gehoor te gee aan die noodmaatreëls. Hy het gesê dat almal in Zimbabwe moet optree asof hulle reeds die virus onder lede het en nie hulle vriende en familie wil aansteek nie.

    Die eerste dag het grootliks vreedsaam verloop met min gevalle van mense wat die inperkingmaatreëls probeer verontagsaam het.

    Na verwagting sal die inperking nog meer oorlewingsdruk op die algemene Zimbabwiese bevolking plaas. Die land gaan gebuk onder hiperinflasie en ingrypende tekorte aan basiese lewensmiddele. Dit is as gevolg van die rampspoedige grondroofprogram van die voormalige president van Zimbabwe, Robert Mugabe, wat twintig jaar gelede afgeskop het.

    Daar is tot op hede sewe gevalle van Koronavirusbesmetting in Zimbabwe geïdentifiseer en een persoon is dood daaraan.

  • Helikoptergeld vir ‘armes’: nuwe linkse plan

    Helikoptergeld vir ‘armes’: nuwe linkse plan

    Suid-Afrika mag dalk binnekort R25 miljard “weggee” aan sogenaamde “kwesbare mense” wat glo meer as ander onder die huidige inperking ly. Soortgelyke voorstelle word gewoonlik deur ekonome as “helikoptergeld” bestempel omdat dit neerkom op note wat uit helikopters oor die bevolking gestrooi word.

    Volgens ‘n berig in Rapport vandag, is so ‘n plan gister deur ‘n “taakspan” gefinaliseer en “word vandag voorgelê aan pres. Cyril Ramaphosa se nasionale bevelsraad vir die Covid-19-rampkrisis”.

    Die persoon aan die hoof van die taakspan is ‘n linkse Engelse vrou, dr. Kate Philip, wat aan die nie-regeringsorganisasie, TIPS (Trade & Industrial Policy Strategies) verbonde is. Haar NGO het in die verlede gepoog en misluk om “sosalistiese strategieë” op die Suid-Afrikaanse platteland te vestig.

    TIPS word deur die Britse regering, die EU, asook USAID befonds, instellings wat oor die algemeen links-progressiewe organisasies in Suid-Afrika bevorder.

    In ‘n artikel wat ‘n week gelede op die ekstreemlinkse webblad, Daily Maverick, verskyn het, maak Philip ‘n saak daarvoor uit dat die ANC-bewind R25,5 miljard uit die Werkloosheidsversekeringsfonds (op Engels bekends as U.I.F.) moet toeëien en dit aan informele handelaars en bediendes moet uitdeel, mense wat nog nooit tot dié fonds vir salaristrekkers bygedra het nie.

    Sy skryf:

    What would it cost? Targeted at six million people, with a payment of R1,000 a month for three months tapering to R750 and R500 in the outer months, this would cost R25.5-billion. The R1,000 level aligns with programmes such as the Community Work Programme and Youth Service and avoids the risk of arbitrage between programmes. These payments would start per person on successful application, with the rollout therefore staggered over a period of time as people enrol, within a window period for applications that could stay open for six months. The sooner enrolments take place the better, but the poverty impacts of this crisis are likely to extend well beyond the peak infection period, so staggered rollout has its own advantages.

    Where would the money come from? This would be a legitimate use of the UIF Reserve of over R150-billion raised from workers and the private sector to provide social protection in a context of unemployment. Using these unclaimed funds for the purpose of a special Covid-19 grant is directly aligned with the mandate of the fund; some of the other claims currently being made on it are not.

    Met die huidige skaarste aan bepaalde verbruikersgoedere wat deur die inperking veroorsaak word, tesame met die swak rand, kan die beoogde “helikoptergeld” vir die informele sektor dalk net die vonk verskaf om Suid-Afrika op die Zimbabwe-pad te plaas, met ‘n verder tuimelende geldeenheid, hoë werkloosheid en inflasie te midde van ‘n stagnante ekonomie, oftewel “stagflasie”.

    Dr. Kate Philip is die dogter van die voormalige uitgewer David Philip van Kaapstad. Sy was ook die voorsitster van Nusas in die tagtigerjare toe sy onder meer tydens ‘n terreurondersoek deur die ou regering aangehou is.

    Toe Cyril Ramaphosa as sekretarisgeneraal van die NUM in 1987 veroorsaak het dat 40 mynwerkers hul werk deur ‘n grootskaalse staking verloor het, het hy agterna ‘n “werkskeppingsprojek” met buitelandse geld geloods waarvoor Kate Philip insgelyks gewerk het.

    In ‘n onderhoud het sy verduidelik hoe sy die pos by die Nasionale Unie van Mywerkers verkry het:

    My detention in solitary confinement under security laws during this period was given high profile. Thereafter, I was part of the editorial collective of an alternative newspaper (SASPU National) that provided extensive coverage of local anti-apartheid struggles and that was widely distributed inter alia by the Congress of South African Trade Unions (COSATU). Writing for the paper, I engaged with activists from many trade unions and sectors. All of the above meant that – as I explain in the book – when I arrived for the job interview for the post in NUM, the process began with handshakes and greetings of ‘comrade’ all around: which is just how it was in those days.

     

  • Suid-Afrika het 709 koronavirusgevalle met Gauteng die brandpunt

    Suid-Afrika het 709 koronavirusgevalle met Gauteng die brandpunt

    Die getal Covid-19-sake in SA het tot 709 gestyg, ‘n toename van 155 op die vorige dag, het Zweli Mkhize, minister van gesondheid, Woensdagoggend gesê.

    Die grootste toenames in die aangemelde gevalle sedert Dinsdag is in Gauteng (64), Wes-Kaap (61), KwaZulu-Natal (11) en die Vrystaat (15), het hy in ‘n onderhoud met die SAUK gesê.

    Die ANC-minister het gesê dat die konsentrasie van gevalle rondom Mangaung in die Vrystaat kommerwekkend is, en dat die Rooi Kruis die departement van gesondheid help om mense op te spoor wat by ‘n kerkbyeenkoms was wat bygewoon is deur vyf reisigers van oorsee wat positief vir die siekte getoets he .

    ‘Dit is ‘n groot bekommernis,’ het hy gesê en Mangaung beskryf as ‘n opkomende episentrum.

    Daar is ook groepe van Covid-19 in Sandton, Ekurhuleni, Tshwane en Kaapstad, het hy gesê.

    Die belangrikste bron van die siekte was reisigers uit Europese lande, maar daar was ‘n toenemende aantal gevalle van binnelandse oordrag, het hy gesê.

    Volgens die minister was daar geen sterftes nie, en slegs twee pasiënte verkeer tans in hoësorg. Vyf van die eerste gevalle het heeltemal herstel en negatief getoets vir Covid-19.

    Drie gesondheidsorgwerkers het tot dusver positief getoets vir Covid-19, het hy bygevoeg.

    Mkhize het gesê dat die nasionale inperking van drie weke wat president Cyril Ramaphosa Maandagaand aangekondig het, bedoel is om die plaaslike oordrag van die virus te vertraag deur die kontak tussen mense soveel moontlik te beperk, met die fokus op die voorkoming van groot groepe mense wat saam verkeer.

    Mense kan egter steeds gaan draf of met hul hond gaan stap, het hy gesê.

    “Daar behoort nie ‘n probleem daarmee te wees nie,” het hy gesê.

    Die inperking sal vanaf middernag op Donderdag in werking tree, en stel streng beperkings op die beweging van mense, wat na verwagting tuis sal bly, behalwe vir inkopies vir noodsaaklikhede soos kos en medisyne, om gesondheidsorg te bekom of maatskaplike toelaes te ontvang.

    Noodsaaklike werkers, waaronder mense wat in gesondheidsorg, nooddienste, die polisie en weermag werk, asook in die vervaardiging en verspreiding van noodsaaklike voorrade soos voedsel en farmaseutiese produkte, word van hierdie maatreëls onthef.

    Mkhize het Suid-Afrikaners aangemoedig om die regering se oproep om sosiale interaksie te beperk, te eerbied en gesê dat die sluiting nie bedoel is om ‘n vakansie van drie weke te wees nie. As mense versuim om die reëls vir die inperking in ag te neem, sou dit nie werk nie, het hy gesê.

  • Japannese griepmiddel laat Italië hoop skep

    Japannese griepmiddel laat Italië hoop skep

    Italië vestig nou hoop op, Avigan, ʼn Japannese middel om die Sjinese virus te beveg.

    Die regering het die groen lig gegee “om ʼn eksperimenterings- en navorsingsprogram te ontwikkel om die uitwerking van die middel (Avigan) tydens die vroeë fases van die siekte te evalueer.” Aldus die Italiaanse Minister van Gesondheid, Roberto Speranza, na afloop van ʼn vergadering van die Tegnies-wetenskaplike komitee.

    Volgens die Raadslid vir die Begroting, Davide Caparini, is Avigan as ʼn voorskriflose middel in Japan beskikbaar sedert 2014 waar dit suksesvol as griepwerend gebruik is. Hy het beklemtoon dat die Italiaanse navorsers nog moet vasstel tot watter mate die middel suksesvol sal wees.

    Die navorsingseksperimente sal onmiddellik afskop in Lombardye.

    ʼn Generiese middel, Favipiravir, is deur die Toyama Chemiese Maatskappy, ʼn filiaal van Fujifilm, ontwikkel en vir Covid-19-pasiënte toegedien in Sjina.

  • Brief: ANC-bewind gaan blanke kleinsake uitsluit van Covid-19-hulp!

    Brief: ANC-bewind gaan blanke kleinsake uitsluit van Covid-19-hulp!

    30% Buitelanders het meer waarde vir die regering as sy wit burgers.

    Swart werkers in die diens van nie-SEB-maatskappye suig ook duidelik aan die agterspeen.

    Dit is ongelooflik dat ‘n regering in ‘n krisissituasie soos hierdie nog teen sy eie burgers kan diskrimineer op grond van velkleur.

    Afgesien van die onmenslikheid en kortsigtigheid hiervan, is dit ook ‘n groot verleentheid vir SA want dit is seker die enigste land ter wêreld waar ‘n regering so kortsigtig is.

    Self en ek glo baie ander ook, het ek gehoop dat hierdie tipe rassisme ten minste in hierdie moeilike tyd, sal verdwyn.

    Duidelik is dit nie die geval nie.

    Die ANC kies nie die land nie, maar kies steeds sy NDR-ideologie.

    En steeds gaan wit boere elke dag hard werk om te verseker daar is kos vir ALMAL… net om later weer te hoor, ons wil julle nie eintlik hê nie.

    Maar ons moet positief bly, aanhou bid, en toegee en toegee… die geduld raak nou op!

    Suid-Afrika gaan van Vrydagoggend vroeg in “lockdown” wees. Pleks dat die land fokus op die bekamping van COVID-19, is die fokus op ‘n klomp rassistiese SEB-maatreëls wat versteek is in die finansiële hulp wat president Cyril Ramaphosa Maandagaand aangekondig het. Dit is jammer dat baie energie nou in die verkeerde rigting gaan.

    Italië gaan deur ‘n lewende hel. Lombardye in Italië het ‘n maand gelede 750 hoësorgbeddens gehad. Nou het hul meer as 3000 hoësorg- COVID-19-pasiënte.

    —Koot van der Ryst