Die rand het Maandagoggend gesonder teen die dollar vertoon en die goudprys het ook sy kop gelig.
Vandag is ‘n openbare vakansiedag in die VSA. Amerikaners herdenk George Washington, die land se eerste president, se verjaarsdag wat altyd op die derde Maandag in Februarie val, selfs al is Washington op 22 Februarie 1732 gebore.
Die dollar vertoon swak nadat ekonomiese goeisyfers uit die VSA nie bemoedigend was nie.
Produksie het onverwags in Januarie die skerpste daling sedert Mei 2009 getoon. Die daling word toegeskryf aan onverwagse koue winterweer, wat kleinhandelverkope negatief geraak het.
Die rand het teen 08:20 op R10,86 teenoor die dollar verhandel en die pond het die hoogste vlak teenoor die dollar sedert November 2009 bereik.
Sowel die Australiese dollar as die jen het veld gewen teen die Amerikaanse geldeenheid.
Die Federale Reserweraad sal waarskynlik besluit om aan te hou om geld te druk en dus sal kwantitatiewe verligting (QE) nie afgeskaal word nie.
Leave a Reply
You must be logged in to post a comment.