praag.co.za

Category: Sake

  • Fitch behou Suid-Afrika se kredietgradering

    Fitch behou Suid-Afrika se kredietgradering

    Die Rand het tot sy beste vlak in vyf weke verstrek nadat die graderingsagentskap, Fitch Suid-Afrika se kredietgradering behou het.

    Die Suid-Afrikaanse geldeenheid het teen R14,70 teen die dollar verhandel wat die beste sedert 4 Mei is.

    Adjunk-president Cyril Ramaphosa het die sakesektor, arbeidsorganisasies én die regering gevra om saam te werk om ‘n rommelstatusgradering in die toekoms ook af te weer.

    Hy het in Sandton gesê harde werk en samewerking tussen die verskillende sektore in die land, het tot die Fitch-graderingsagentskap se besluit bygedra.

    Ramaphosa sê die samewerking tussen die minister van finansies, sakeleiers en arbeidsleiers vir die eerste maal in die land se geskiedenis, het verseker dat die land nie tot rommelstatus afgegradeer is nie.

    Cosatu het Fitch se besluit verwelkom, maar sê dit moet nie slegs die doelwit wees om dié agentskappe gelukkig te hou nie.

    Fitch het Suid-Afrika se kredietgradering onveranderd gelaat op BBB-minus met bestendige vooruitsigte. Die agentskap het egter gewaarsku dat die lae groei in die BBP ‘n risiko inhou.

    ‘n Woordvoerder van Cosatu, Sizwe Pamla sê noudat die agentskappe Suid-Afrika ‘n blaaskans gegee het, moet ‘n werksberaad gehou word om te verseker dat daar nie so baie werksverliese is nie.

    Die Rand het vroeër met sowat ses persent toegeneem het nadat Standard and Poor’s Vrydag besluit het om ook Suid-Afrika se kredietgradering te behou.

    Woensdag se besluit deur Fitch is wyd verwelkom, alhoewel voorwaardes gegee is dat Suid-Afrika voor Desember hervormings sal moet instel en die ekonomie stimuleer.

  • SA se kredietgradering onveranderd

    SA se kredietgradering onveranderd

    Die kredietgraderingsagentskap, Standard and Poor’s het Suid-Afrika se kredietgradering onveranderd gelaat. Die huidige gradering is BBB-minus met ‘n negatiewe vooruitsig.

    Die agentskap het nogtans gewaarsku dat enige tekens van politieke omwenteling wat die ekonomiese beleid kan ondermyn, daartoe kan lei dat ‘n afgradering later vanjaar gedoen kan word.

    Nog ‘n agentskap, Fitch se gradering word dié week verwag.

    Die minister van finansies, Pravin Gordhan het die besluit verwelkom en gesê die besluit toon dat die land se ekonomie veerkragtig is.

    Gordhan sê ekonomiese groei moet in die volgende paar maande uitgebrei word om te verseker dat die krediet nie in Desember afgegradeer word nie.

    S&P se besluit is soortgelyk aan die van Moody’s wat die land se gradering op ‘n kerf bo rommelstatus met ‘n negatiewe vooruitskatting gelaat het.

    Moody’s het Suid-Afrika se gradering verlede maand dieselfde gehou, maar die ekonomiese vooruitskatting na negatief verander.

    Die Rand het kort na die aankondiging teen die dollar gestyg wat op ‘n stadium meer as twee persent beter was as die dag tevore se verhandeling.

    Ekonome meen die land huiwer op die rand van ‘n resessie en dat ‘n afgradering die ekonomie in ‘n resessie sal indwing.

    Die Bankvereniging van Suid-Afrika (Basa) het gesê Standard en Poor’s se besluit is ‘n mylpaal op die weg na sterker ekonomiese groei.

    Basa het in ‘n verklaring gesê daar moet nog harder gewerk word om volhoubare groei te verseker en dat fiskale dissipline en beleidsekerheid kritieke voorvereistes vir groei is.

    President Jacob Zuma het ook Standard en Poor’s se besluit verwelkom en het in ‘n verklaring die regering, sakelui en georganiseerde arbeid geloof en sê die afgelope maande se samewerking het daarin geslaag om die ekonomie op ‘n herstelpad te plaas.

    Zuma sê deur samewerking kan ekonomiese groei aangewakker word, beleggings gelok word en werkskepping verbeter.

    Die Kamer van Mynwese het ook die graderingsbesluit verwelkom en sê dit gee die land ses maande grasie om die situasie te verbeter.

  • Reserwebank hou repokoers maar haal skouers op oor Guptas

    Reserwebank hou repokoers maar haal skouers op oor Guptas

    Die president van die Reserwebank, Lesetja Kganyago, sê die bank het nie die besluit van die handelsbanke om die maatskappy Oakbay Investments se bankrekenings te sluit beïnvloed nie.

    Hy het dié opmerking gemaak tydens die aangekondiging dat die repokoers onveranderd op sewe persent sal bly, het RSG berig.

    Die president van die Reserwebank het die aankondiging by ‘n vergadering van die Monetêre Beleidskomitee van die bank in Pretoria gedoen.

    Dit beteken dat die prima uitleenkoers op 10,5% persent bly.

    Die aankondiging is wyd verwag na Statistiek Suid-Afrika se aankondiging dat die inflasiesyfers beter is as wat verwag is.

    Die Verbruikersprysindeks het in April op ‘n jaar tot jaar grondslag tot 6,2% verlangsaam.

    Kganyago sê hy is bekommerd oor die verwagte styging in voedsel-en brandstofpryse in die komende maande.

    Die land se vier grootste banke het hulle verhoudinge met Oakbay verbreek na bewerings dat sy eienaars, die Guptafamilie, ongeoorloofde politieke invloed by president Jacob Zuma het.

    Zuma en die Guptas het sedertdien die bewerings ontken.

    Kganyago sê Oakbay se enigste opsie is om hof toe te gaan.

  • Moody’s gradeer SA af van stabiel na negatief

    Moody’s gradeer SA af van stabiel na negatief

    President Jacob Zuma het die besluit van die graderingsagentskap Moody’s verwelkom om nie Suid-Afrika se oorhoofse kredietgradering te verlaag nie.

    Moody’s het bevestig dat die land se kredietgradering dieselfde bly, maar egter gesê dat die uitkyk van stabiel na negatief verander is met ‘n Baa2-gradering.

    Volgens Moody’s sal Suid-Afrika steeds twee kerwe bokant sub-beleggingsgraad gegradeer word.

    Zuma sê die kredietagentskap se besluit toon dat die regering vordering maak met transformasie, maar die rand het weer teruggesak nadat dit aanvanklik effens herstel het toe die nuus uitgekom het.

    Die sentiment op die markte was gemeng met vrese dat Fitch en Standard & Poor steeds die land se kredietgradering afwaarts kan aanpas.

    Die agentskap het gesê Suid-Afrika is by ‘n keerpunt na ‘n paar jaar van dalende ekonomiese groei.

    Die Internasionale Monetêre Fonds het intussen die ANC geloof vir hul verhoogde samewerking met die privaatsektor.

    Die IMF sê dit kan die implementering van transformasie aanhelp en ekonomiese groei ondersteun.

    Maar dit is nie seker of vertroue in die Suid-Afrikaanse ekonomie by die Wêreld Ekonomiese Forum (WEF) oor Afrika 2016 in Rwanda hierdie week volkome sal herstel nie.

    Beleggings in staatsinstellings deur die privaatsektor is Maandagaand op ‘n hoëvlakvergadering in Pretoria bespreek op die vooraand van die Rwanda-byeenkoms.

    Zuma en sy adjunk, Cyril Ramaphosa het met bestuurshoofde van maatskappye en vakbondleiers by die Uniegebou in Pretoria vergader oor die kwessie.

    Die president het van die maatreëls wat beleggersvertroue sal aanwakker, toegelig.

    Die regering sê hy bly daartoe verbind om besteding aan energie, infrastruktuurontwikkeling, landbou en die veredeling van minerale te verhoog.

  • Wêreldbank sê armoede in SA kan toeneem

    Wêreldbank sê armoede in SA kan toeneem

    Vir die eerste keer sedert 1994 is armoede in Suid-Afrika aan die toeneem, het die Wêreldbank gesê.

    Volgens die Wêreldbank het ekonomiese aktiwiteit in Sub-Sahara-Afrika in 2015 afgeneem, met BBP-groei van gemiddeld 3 persent, af van 4.5 persent in 2014.

    “Die 2016 groeivooruitsigte bly gedemp by 3,3 persent, ver onder die sterk groei van 6.8 persent in die BBP wat die streek in die tydperk 2003-2008 getoon het,” luidens die Pulse-verslag.

    Kommoditeitsprysrisiko in 2016 het Afrika se sak met ‘n geraamde 16 persent geraak, met kommoditeitsuitvoerders wat groot verliese ly, het die verslag uitgewys.

    “Om groei en maatskaplike ontwikkeling te verseker, moet stede goedkoper vir maatskappye en meer aantreklik vir beleggers word,” sê Punam Chuhan-Pole, waarnemende hoofekonoom van die Wêreldbank-Afrika en die skrywer van die verslag.

    Suid-Afrika se ekonomiese vooruitsigte lyk minder rooskleurig. Die Wêreldbank voorspel dat armoede tot 2017 verder sal toeneem van 36% tot 37,5%.

    Die land se ekonomie sal vanjaar met net sowat 0.8% groei, teenoor 2015 se sukkelende 1,3%.

    Die swak ekonomiese vooruitsigte word grootliks aan beleidsonsekerheid toegeskryf wat die wisselkoers, die aandeelbeurs en die koste van lenings negatief raak.

    Die moontlikheid dat staatskuld na rommelstatus afgegradeer kan word, kan voorts bykomende fiskale druk skep.

  • Rand herstel na rentekoersverhoging

    Rand herstel na rentekoersverhoging

    Die Rand het Donderdagaand tot R15,10 teen die dollar herstel nadat ‘n rentekoersverhoging aangekondig is.

    Die jongste verhoging beteken dat die prima uitleenkoers tot 10,5 persent styg.

    Die Suid-Afrikaanse geldeenheid het Woensdag tot R16,20 teen die dollar gedaal nadat die adjunk-minister van finansies onthul het dat die Gupta-familie by regeringsaanstellings betrokke is.

    Mcebisi Jonas het bekend gemaak het dat hom die pos as minister van finansies aangebied het.

    Die herstel van die rand kom egter nadat die president van die Reserwebank, Lesetja Kganyago, bekend gemaak het dat die repokoers met 25 basispunte tot sewe persent verhoog word.

    Kganyago sê die Reserwebank verwag dat inflasie vir ‘n geruime tyd meer as ses persent sal bly en het die jongste rentekoersverhoging verbind aan die risiko’s met die inflasie-vooruitskatting.

    Die jongste verhoging beteken dat die primauitleenkoers tot 10,5 persent styg.

  • NERSA keur verhoging van byna 13% vir Eskom goed

    NERSA keur verhoging van byna 13% vir Eskom goed

    Nersa, die nasionale elektrisiteitsreguleerder, het volgens ‘n verklaring van Eskom ‘n “gemiddelde prysverhoging van 12,69% vir 2015/16 toegestaan, wat opgemaak is uit die 8% jaarlikse verhoging in die oorspronklike MYPD 3-besluit en ‘n bykomende 4,69% soos toegelaat deur die inkomsteverwerkingsrekeningsmeganisme wat deel uitmaak van Nersa se reguleringsmetodiek”.

    Hierdie mondvol beteken dat Eskom ‘n verdere R11,8 miljard aan inkomste deur Nersa toegestaan is, omtrent die helfte van dít waarvoor die elektrisiteitsverskaffer aansoek gedoen het.

    Die hoof van Eskom, Brian Molefe, klink ongelukkig, ondanks die groot verhoging wat minstense twee maal die inflasiekoers verteenwoordig. In ‘n verklaring sê hy:

    “Eskom neem kennis van Nersa se besluit, waarin die vraag van Eskom se finansiële volhoubaarheid weereens nie opgelos word nie. Daarbenewens sal dit operasionele gevolge hê.”

    “Ons neem kennis van Nersa se besluit en sal die besonderhede wat in die besluitdokument vervat is bestudeer as ons dit ontvang voordat ons oor die implikasies kommentaar lewer,” het hy verder gesê.

    Volgens Molefe sal hulle hul “bes probeer om die risiko van beurtkrag te beperk, en om ‘n balans met Eskom se reeds uitgeputte balansstaat te vind”.

  • Rand daal skerp na Gordhan se begrotingsrede

    Rand daal skerp na Gordhan se begrotingsrede

    Die minister van Finansies, Pravin Gordhan het in sy Begrotingsrede in die Parlement gesê die land kan nie geld bestee wat hy nie het nie en kan nie meer geld leen as wat hy kan terugbetaal nie.

    Hy het gesê die begroting sal eerder fokus op fiskale konsolidasie, maar markte het nogtans negatief gereageer.

    Gordhan moes probeer voorkom dat Suid-Afrika na rommelstatus afgegradeer word. Die rand het kort na die begrotingsrede met sowat 30 sent teen die Amerikaanse dollar gedaal.

    Gordhan het verwys na die tekort op die begroting wat binne drie jaar van 3,2 persent tot 2,8 persent verminder behoort te word.

    Hy sê maatreëls om die ekonomiese toestande te verbeter sluit die inkorting van besteding en die verhoging van belasting in.

    Gordhan sê tot ekonomiese groei gestimuleer kan word en sodoende ‘n groter inkomste vir die staat meebring, moet uitgawes beperk word, dus moet skuld as ‘n persentasie van die Bruto Binnelandse Produk gestabiliseer word.

    Die minister sê die regering beoog om belastinginkomste in die 2016/2017 belastingjaar met agtien miljard rand te verhoog en volgende jaar met ‘n verdere vyftien miljard rand.

    Die minister van Finansies het belastingverligting van R5,5 miljard vir middel- en laerinkomstegroepe aangekondig, maar nuwe belastings ingestel.

    Die regering beoog om vanaf 1 April aanstaande jaar ‘n nuwe belasting op koeldrank en vrugtesap in te stel wat suiker bevat.

    Die brandstofheffing word met 30 sent per liter verhoog en ‘n belasting op voertuigbande sal ingestel word.

    Aksynsbelasting op drank en tabak sal tussen ses en agt persent styg.

    Bejaardes sal maandeliks 80 rand meer ontvang in ouderdomspensioen, wat die toelae op R1500 per maand te staan bring. In Oktober sal ‘n verdere tien rand per maand bygevoeg word.

    Kindertoelae word tot R350 per maand verhoog, en die toelae vir pleegsorg styg tot R890 per maand.

    In totaal word ‘n bykomende 11,3 miljard rand oor die volgende drie jaar begroot vir maatskaplike toelaes.

    Die DA se skaduminister van Finansies, David Maynier sê intussen die begrotingsrede het nie ‘n sterk genoeg impak gemaak deur nuwe maatreëls aan te kondig om die ekonomie ‘n hupstoot te gee en werksgeleenthede te skep nie.

    Maynier sê dat die beplande besnoeiings nie ver genoeg gaan nie.

    Hy sê Gordhan kon President Jacob Zuma se kabinet kleiner gemaak het, wat R4,7 miljard rand kon bespaar het.

    Gordhan het ook tydens die begrotingsrede gesê die begroting is deur die Nasionale Ontwikkelingsplan gerig.

    Hy sê dit is gemik op inklusiewe groei, beklemtoon vennootskappe tussen rolspelers in die ekonomie, en lê klem op onderwys en infrastruktuurontwikkeling.

    Gordhan het ook gesê die begroting steun werkskepping en die bou van ‘n volhoubare ontwikkelingstaat.

    Die minister het sy verbasing oor die skerp daling in die rand en staatseffekte uitgespreek nadat hy sy begrotingsrede in die Parlement gelewer het.

    Gordhan sê hy voel hy het genoeg gedoen om ‘n afgradering in die land se beleggingsgradering te voorkom.

  • Miljardêr het saamgewerk met Zuma en Guptas

    Miljardêr het saamgewerk met Zuma en Guptas

    Glencore het saamgewerk met “belanghebbendes” insluitend die regering om sy Optimum-steenkoolmyn te verkoop, het die Sunday Times vroeër berig.

    ‘n Suid-Afrikaanse minister het Glencore se hoofuitvoerende beampte, Ivan Glasenberg ontmoet voor die verkoop van die myn aan ‘n groep vriende van President Jacob Zuma.

    Glencore se sukkelende myn was reeds oorhandig aan kurators, nadat die myn versuim het om Eskom te oortuig om die terme van ‘n ooreenkoms met Glencore Optimum te heronderhandel.

    Dié ooreenkoms was uiters nadelig vir Eskom.

    Die myn is verkoop aan Tegeta, ‘n maatskappy wat beheer word deur die Gupta-familie. Een van Zuma se seuns sal ook baat by die transaksie.

    “Glencore is besig met die reddingsakeplan van Optimum Coal saam met alle ander belanghebbendes, insluitend die regering” het die maatskappy in ‘n e-pos antwoord op vrae gesê. “Glencore is tevrede met die bepalings betreffende die Tegeta-transaksie.”

    Die Sunday Times het berig dat Mosebenzi Zwane, Suid-Afrika se minister van mynbou, die einde van verlede jaar met Glasenberg by die Dolder Grand Hotel in Zürich ontmoet het om die verkoop van die myn te fasiliteer.

    Intussen probeer opposisiepartye en die Britse pers voorgee dat Glencore nie saamgewerk het om die Zuma-gesin te bevoordeel nie.

    Die Guptafamilie het intussen gesê dit behoort enigiemand vry te staan om op ‘n billike grondslag met enige sake-onderneming mee te ding.

    Hulle maatskappy Tegeta Exploration and Resources sê hy is op soek na nog sakegeleenthede nadat die maatskappy die groenlig gekry het om Glencore se Optimum-steenkoolmyn aan te skaf.

    Opposisiepartye het Zwane oor die kole gehaal omdat hy met Glasenberg in Switserland beraadslaag het.

    Die partye sê dit het die president se seun en die Gupta-familie bevoordeel.

    Die Guptas sê egter hulle het geen bystand van die minister gekry om die transaksie te beklink nie.

    Die miljardêr Glasenberg, Suid-Afrika se rykste man, het Glencore se dividendbetalings geskrap en nuwe aandele gesmous om skuld wat opgebou tydens ‘n kommoditeitoplewing te betaal.

    Die maatskappy het in Desember aangekondig dat hy beplan om skuld te verminder tot so laag as $18 miljard teen die einde van 2015. Een van die planne was ook om met bateverkope te begin.

    Glasenberg, wat ook Israeli-burgerskap het, het in die Johannesburgse kantoor van Marc Rich (Marcell Reich) gewerk wat miljoene daaruit gemaak het om olie aan die apartheidsregering te verkoop.

    Hy woon in Rüschlikon, Switserland.

  • Google se uitvoerende beampte hoogs besoldigde in die VSA

    Google se uitvoerende beampte hoogs besoldigde in die VSA

    Die uitvoerende beampte van Google, Sundar Pichai, het $199m (R3,2 mijard) se aandele ontvang, volgens ‘n verpligte liassering wat openbaar gemaak is.

    Dit maak van Pichai die hoogs besoldigde uitvoerende beampte in die VSA. Hy het die hoof van die soekenjinmaatskappy geword ná die skepping van ‘n houermaatskappy, Alphabet.

    Die stigters van Google, Larry Page en Sergey Brin, het reeds onderskeidelik skatte van $34,6 miljard en $33,9 miljard vergader, volgens Forbes.

    Die 43-jarige Pichai het op 3 Februarie 273 328 aandele in Alphabet ontvang, volgens ‘n dokument wat by die Amerikaanse SEC (Securities and Exchange Commission) geliasseer is.

    Dié nuwe aandeletoekenning bring Pichai se totale aantal aandele op $650m te staan.

    Die hoeveelheid aandele sal elke kwartaal van nou af tot 2019 geleidelik in sy besit kom.

    Verlede week het Alphabet – Google se houermaatskappy – Apple verbygesteek as die wêreld se waardevolste maatskappy, nadat dit ‘n wins van $4,9 miljard vir die drie maande tot einde Desember aangeteken het, wat hoër is as die $4,7 miljard van ‘n jaar gelede. Op ‘n jaargrondslag het Alphabet $16,3 miljard wins gemaak, hoewel die syfers toon dat die “Other Bets”-filiaal $3,6 miljard tydens dieselfde periode verloor het. Google se bedryfswins het tot $23,4 miljard gestyg, soos wat aanlynadvertensies toegeneem het.

  • Rand vertoon stewiger na rentekoersverhoging

    Die rand het dadelik stewigers vertoon toe die Reserwebank Donderdagmiddag rentekoerse verhoog het, maar verbruikers gaan sukkel met hoër skuldafbetalings.

    Die Reserwebank het Donderdag die rentekoers met 50 basispunte verhoog nadat inflasie van 6,8 persent in die vooruitsig gestel is.

    Die rand het tot R16,15 teen die dollar versterk nadat Lesetja Kganyago, Reserwebankvoorsitter, die bank se repokoers van 6,25% tot 6,75% opgestoot het.

    Die vooruitsigte vir inflasie het “aansienlik verswak” sedert November, sê Kganyago, grootliks weens ‘n swakker rand en hoër voedselpryse agv die droogte.

    Dié verhoging is moontlik ook nie die laaste verhoging vir die jaar nie.

    Kganyago sê sedert die vergadering in November het die rand met 13,5% teenoor die dollar verswak en 15,2% teenoor die euro.

    Prima rentekoers van banke staan tans op 10,25%.

    Die Reserwebank se inflasie-vooruitskatting van bykans sewe persent kan ook binnekort opwaarts aangepas word wanneer nuwe elektrisiteitstariewe goedgekeur word.

    Die Bank sê inflasievooruitsigte is gebaseer op tariefverhogings van twaalf persent.

    Die adjunkpresident van die Bank, Francois Groepe sê sodra die Nasionale Energiereguleerder ‘n besluit geneem het oor Eskom se aansoek oor ‘n verhoging, sal die Reserwebank sy model aanpas indien nodig.

    Ekonome het Suid-Afrikaners intussen gemaan om hulle skuld so gou moontlik af te los.

    Die bestuurshoof van Eerste Nasionale Bank, Jacques Cilliers sê die afbetaling van skuld moet verbruikers se eerste prioriteit wees.

    Cilliers het ook gesê dit is onwaarskynlik dat die jongste rentekoersverhoging die laaste sal wees vir die jaar.

    Die gemiddelde inflasiekoers was 4,6% in 2015.

    Kevin Lings, hoofekonoom van Stanlib, het aan Netwerk24 gesê die verhoging maak dit duidelik die Reserwebank het baie meer bekommerd geraak dat inflasie hoër as die boonste punt van sy teikenband van 6% gaan beweeg én dan “teen ‘n hoër gemiddelde vlak ingegrawe word”.

    Lings verwag dat die rentekoers verder sal styg vanjaar en eindig op 7,5%.

    Ontleders meen hoër rentekoerse sal onvermydelik ten koste van groei en werkgeleenthede geskied.

    ‘n Swak rand, droogtetoestande en hoër kragtariewe wat met hoë rentekoerse aangespreek word, kan die risiko van ‘n resessie beteken.

    Volgens ‘n peiling van nege ekonome deur Bloomberg is die waarskynlikheid dat Suid-Afrika se ekonomie vanjaar vir twee opeenvolgende kwartale krimp, hoog.

    Verwagtinge van ekonomiese groei is ook laer. Groei in 2015 was na raming sowat 1,3% en gaan na verwagting slegs 0,9% wees in 2016, in vergeleke met vorige vooruitskattings van 1,5% en 2,1% onderskeidelik.

    Die hoër rentekeorse gaan toenemende finansiële druk op verbruikers plaas.

  • Rentekoersverhogings verwag

    Die Reserwebank sal na verwagting vanmiddag ‘n verhoging in die rentekoers aankondig ná die bank se monetêre beleidskomitee-vergadering, het RSG berig.

    Volgens ekonome sal die bank ook grootskaalse afwaartse aanpassings in die groei-beramings vir die Bruto Binnelandse Produk bekend maak.

    Die komitee se taak word bemoeilik deur die verswakte inflasie-verwagting, die voortslepende droogte, die swakker rand en die verhoogde kragtariewe.

    Die meeste ekonome verwag dat ‘n verhoging van 50 basispunte aangekondig sal word, hoewel ander meen dit kan slegs 25 basispunte wees.

    Amerikaanse markte het intussen laer gesluit na die aankondiging van die Amerikaanse reserwebank dat rentekoerse in die land nie verhoog gaan word nie.

    Die bank sê die besluit is geneem in die lig van wêreldwye ekonomiese en finansiële ontwikkelings. Die Dow Jones het na die aankondiging met 0,39 persent gedaal en die Nasdaq met 0,92 persent.

  • Honderde mynwerkers in Noord-Kaap gaan werke verloor

    Honderde mynwerkers in die Noord-Kaap gaan hul werk verloor nadat drie myne besluit het om werkers af te dank.

    Die myne in die Kathu-omgewing het hul werknemers in kennis gestel het dat hulle binnekort herstrukturering en moontlike afleggings oorweeg.

    Adele Nel van Tau Mining het bevestig dat Aveng Moolmans, Tau Mining en die Khumani-ysterertsmyn vakbonde kennis gegee het van die voorgenome proses.

    Sy sê hulle gaan ongeveer 175 werkers aflê.

    PSG aandelemakelaar en portefeulje-bestuurder, Amelia Morgenrood, het in ‘n onderhoud met OFM-nuus gesê dat die internasionale daling in oliepryse verreikende gevolge vir die mynbedryf en die regering inhou.

    Arbeidsontleders sê dié afleggings sal die sosio-ekonomiese welstand van inwoners van die Noord-Kaap ten nadele beïnvloed.

  • Mededingingskommissie ondersoek valuta-samespanning

    Die mededingingskommissie het ‘n ondersoek geloods na samespanning deur sekere valutahandelaars, maar het ontken dat die daling van die rand ondersoek word.

    ‘n Woordvoerder van die kommissie, Themba Mathebula het bevestig dat ‘n ondersoek na valutahandelaars van stapel gestuur is.

    Hy het gesê bankinstellings waaronder BNP Paribas, Citigroup, Barclays, JP Morgan Chase, Investec en Standard Chartered is tans onder die vergrootglas.

    Mathebula sê sommige handelaars het na bewering pryse vasgestel.

    Die rand het verlede jaar met 25 persent teenoor ‘n mandjie van geldeenhede gedaal en verhandel nou na aan R16,50 teenoor die dollar.

    Die kredietgraderingsmaatskappy Standard en Poor het vroeër weer gewaarsku dat Suid-Afrika tot rommelstatus afgegradeer sal word.

    Die agentskap het gesê dat swak ekonomiese groei en die regering se finansiële hulp aan staatsentiteite, binnekort daartoe kan lei dat die land rommelstatus bereik.

    Standard en Poor sê in ‘n verslag Suid-Afrika loop die gevaar om nie sy fiskale teikens te haal nie.

    Volgens aanduidings wil die Reserwebank sy vooruitsigte vir ekonomiese groei verlaag tot sowat 1%.

    Die Tesourie moes miljarde rand se waarborge lewer asook lenings toestaan aan maatskappye in staatsbesit soos Eskom en SAL om hulle in bedryf te hou.