\n
Die vakbond Solidariteit gaan m\u00f4re om 12:00 met \u0149 openbare veldtog teen Woolworths begin indien die groep nie advertensies vir poste, waarvoor slegs swart kandidate oorweeg sal word, terugtrek nie. Die veldtog sal grootliks op sosiale media gevoer word.<\/p>\n
Solidariteit het vandag in \u0149 brief aan Woolworths ge\u00ebis dat die groep advertensies van poste, wat uitsluitlik vir \u201cswart Afrikane\u201d of slegs \u201cAfrikane, kleurlinge en Indi\u00ebrs\u201d oop is, wysig sodat mense van alle rasgroepe daarvoor oorweeg sal word. Dirk Hermann, adjunk uitvoerende hoof van Solidariteit, het in sy brief aan Woolworths ge\u00ebis dat die groep die posadvertensies voor Woensdag 12:00 wysig. Hermann het aan Woolworths ges\u00ea dat sy toepassing van die Wet op Gelyke Indiensneming nie korrek is nie en neerkom op onbillike diskriminasie.<\/p>\n
\u201cDie Wet op Gelyke Indiensneming maak nie voorsiening vir die uitsluiting van enige ras wanneer dit kom by aansoeke nie. Hierdie advertensies kom neer op \u0149 absolute kwota, wat die wet doelbewus verbied. Die vakbond het \u0149 beroep gedoen op Woolworths om sy interne beleid van regstellende aksie te hersien sodat dit nie onbillik teen huidige of voornemende werknemers van enige rasgroep diskrimineer nie.\u201d Volgens Solidariteit laat die wet nie sodanige diskriminasie toe nie, en gaan die openbare mening ook nie sulke diskriminasie toelaat nie.<\/p>\n<\/p>\n