Ek is gebore in millennium 1132, jaar 17, maand 2, dag 11; ons kalender gaan nie verder terug as ongeveer 11 miljoen jaar gelede nie. Ek veronderstel elke beskawing beskik oor sy jaar nul, sy ontstaansoomblik. Ons planeet is baie oud, amper so oud soos die sterrestelsel en ons son, die naaste ster waaromheen ons wentel. Hoe die w\u00eareld gelyk het in die voortyd, voordat ons begin tel het, weet ek nie. Al wat ons het, is die fossiele, asook die voorstellings, die hipoteses en teorie\u00eb van wetenskaplikes.<\/p>\n
Ek voel dat ek my verhaal m\u00f3\u00e9t vertel, vir diegene wat n\u00e1 ons kom, vir my kinders en hulle kinders en hoe ver my nageslag ook al in die toekoms mag strek, wat seker nie te ver gaan wees nie. Want presies twee jaar voor my geboorte, het \u2018n ongekende ramp Nemia getref. In die verafgele\u00eb noordelike oerwoud het \u2018n ruimteskip neergestort. Daar was \u2018n groot ontploffing wat deur die seismograwe en die holograwe opgeteken is. Latere weergawes van die ruimteskip se noodlanding het dit aangetoon as \u2018n min of meer ovaalvormige voorwerp wat die oppervlak van Nemia aanvanklik egalig genader het, maar toenemend onstabiel geraak en toe neergestort het. Enkele ure n\u00e1 die neerstorting het \u2018n groot ontploffing gevolg wat die wrakstukke oor \u2018n wye oppervlak versprei het.<\/p>\n
My vader Sarius, wat toe nog betreklik jonk was, was lid van die ondersoekspan wat na die ongeluksgebied uitgestuur is. Hy het dit onlangs aan my in groot besonderhede vertel en my jeugdige verbeelding het die res ingevul. Dit was amper asof ek self daar was. Of die hele ongeluk via intydse holografiese beelde, sekond vir sekond, gevolg het. In daardie oomblikke is die lot van ons beskawing en ons planeet verse\u00ebl. Maar dit sou ons eers enkele jare later agterkom.<\/p>\n
Die tuig was groot, groter as enigiets wat nog ooit op Nemia gebou is. Volgens my vader kon daar tot soveel as 7 000 Oertoeke aan boord gewees het. Agterna was daar bloot min of meer verkoolde lyke – karkasse is miskien \u2018n meer gepaste woord, want ek beskou nie die Oertoeke as mense of ho\u00ebr wesens nie – wat oor die ongeluksgebied verstrooi gel\u00ea het.<\/p>\n
Toe die opperraad van ho\u00ebpriesters van die voorval te hore kom, het hulle onmiddellik die span wetenskaplikes en kundiges laat saamstel, wat per sweeftuig na die oerwoud versend is. Die werk was gevaarlik, want in die ongerepte oerwoud het allerlei gevaarlike reptiele en roofdiere geskuil wat die lede van die ondersoekspan kon bedreig. Ons Nemiane glo dat alle lewensvorme heilig is en daarom mag ons nie eens die diere wat ons aanval, doodmaak nie. Elke lid van die ondersoekspan is met \u2018n laserskokpistool toegerus om die lastige attensies van roofdiere of reptiele die hoof te bied.<\/p>\n
Volgens die scenario wat my vader-hulle agterna saamgestel het, het die ruimtetuig vol Oertoeke die bome se sambreeltakke eers begin breek soos \u2018n groot bal wat daarop land en toe die grond teen ongeveer 30 meter per sekonde getref. Onmiddellik n\u00e1 die slag was die meeste Oertoeke binne-in die tuig dalk beseer, maar nie dood nie. Daar was sitplekke met gordels aan wat hulle beskerm het, ook die kinders. Hul bre\u00eb, plat, growwe gesigte moes tegelyk ontsteld en verdwaas na mekaar gekyk het. \u2018n Geroesemoes van stemme in hul vreemde, frikatiewe taal, onderbreek deur daardie dierlike gromgeluide wat hulle ook maak, moes losgebars het.<\/p>\n
Of die tuig se deure nog geredelik gewerk het vir die uitklimslag, weet ons nie. Mettertyd sou sekere Oertoeke egter hul weg na buite gevind het, al hoe verder van die gestrande ruimtetuig deur die ruie oerwoud begin dwaal het. Moontlik sou hulle van die meer intelligente en ondernemende tipe gewees het. Enkeles sou dalk deur \u2018n skalmoen of \u2018n basslang aangeval gewees het. Maar gegewe die Oertoek se inherente aggressie, sou hulle hulself met welslae teen sulke aanvalle verdedig het, moontlik selfs die doodgemaakte kat of reptiel op die plek verorber het, want n\u00e1 die lang reis moes hulle honger gewees het.<\/p>\n
Agterna het ons fisici en ander wetenskaplikes intens oor die aard van die ruimteskip se aandrywing gespekuleer. Die mees waarskynlike verklaring daarvoor, asook vir die ontploffing binne enkele ure n\u00e1 die landing, was dat \u2018n vorm van kernfusie die energie vir die tuig verskaf het. Hoewel my vader van beroep \u2018n genetikus is, stel hy ook geweldig in chemie en fisika belang. Hy en sy kollegas meen dat \u2018n vreemde, glasagtige element die ontwerpers van die skip in staat gestel het om groot hoeveelhede gas in \u2018n enkele bal saam te pers, wat eers \u2018n plasma sou vorm en daarna permanent sou begin brand. Presies hoe die energie van hierdie fusiereaktor gebruik is om die tuig aan te dryf, weet ons nie. Dit moes \u2018n pragtige voorwerp gewees het, \u2018n kristalbal wat vir alle praktiese doeleindes \u2018n draagbare of vervoerbare klein sonnetjie was wat hulle op die lang reis vergesel het. Die moontlikhede wat so iets ingehou het, was legio, want met hul eie son aan boord kon hulle ook vars voedsel kweek. Met die hope energie kon hulle waterstof- en suurstofatome uit die ruimte onttrek en tot water sintetiseer.<\/p>\n
Vanwe\u00eb die botsing of \u2018n fout van die bemanning – met hul klein breingrootte is die Oertoeke nie baie intelligent nie – het die reaktor egter binne enkele ure ontplof. Die oorblywende Oertoeke binne die skip is geheel en al vernietig. Op die landingsplek was slegs \u2018n groot krater oor, maar kleiner wrakstukke van die skip is oor \u2018n groot gebied in die oerwoud gevind. Oertoeke verder van die skip af is verkool en diegene wat reeds ver in hul verkenning van die oerwoud gevorder het, is bloot deur die lugdruk van die ontploffing gedood sodat hul bebloede karkasse of liggaamsdele in min of meer ongeskonde toestand op die grond of in die blou en groen mikke van boomstamme gevind is. Dit het die span van ongeveer honderd Nemiaanse wetenskaplikes en ondersoekbeamptes etlike dae geneem om die gebied vir getuienis te fynkam en vir enige oorlewendes te soek, maar geen is gevind nie.<\/p>\n