Dit was \u2019n tipiese sonskyndag in Wellington, Nieu-Seeland… wat beteken dit het meeste van die tyd gere\u00ebn en vir die res was dit triestig en windverwaai. Die Nieu-Seelandse boulers het op hulle kenmerkende sprankelende manier geboul \u2013 met ander woorde hulle was lusteloos, planloos en vir die ganse dag paaltjieloos. Hulle werk, soos hulle dit blykbaar verstaan, is nie om paaltjies te neem nie maar om balle te boul. Die plan, as daar \u2019n plan was, was om te wag dat die kolwers \u2019n fout sal maak en \u2019n paaltjie Nieu-Seeland se kant toe sou gooi. Hulle het nie lank gewag nie \u2013 daar was maar 37 boulbeurte in die dag geboul \u2013 maar hulle het te vergeefs gewag. Die Proteas se twee Kleurlingkolwers, Alviro Petersen en JP Duminy, het moeitelose, dramalose krieket gespeel. Petersen, wat sekerlik genoeg gedoen het om nou in die span te bly, het 96 nie-uit-nie lopies van 224 balle gekry en Duminy was op 76. Een hele dag is reeds verlore, maar as die Proteas hulle eerstebeurttelling kan verdubbel, het hulle waarskynlik genoeg brisant in die arsenaal om die Kiwi\u2019s twee keer uit te boul.<\/p>\n