Die IAAF het gister gesê hulle werk nog agter die skerms met Caster Semenya en die Suid-Afrikaanse regering om aangeleenthede rakende die agtienjarige atleet se geslag en toekoms op te los.

Die beherende atletiekliggaam sê hulle kan nog nie die Suid-Afrikaanse regerings se aansprake dat ‘n ooreenkoms wat Semenya sal toelaat om die wêreldtitel en die prysgeld wat sy in Augustus gewen het, te hou en dat haar geslagtoetsresultate geheim gehou sal word, bevestig nie.

‘n Segsman vir die Internasionale Assosiasie van Atletiekfederasies, Nick Davies, sê dat die partye "amper daar" is met die bereiking van komplekse onderhandelinge.

"Dit is voortydig om die inhoud van wat die Suid-Afrikaanse regering gesê het, te bespreek totdat ons sê ja, ons stem honderd persent saam daarmee," het Davies gesê. "Dit word versigtig polities op een vlak hanteer, maar ook op medies-wetenskaplike gebied.

"Uiteraard werk ons voluit agter die skerms om dit op te los. As ons gelukkig is, kom ons gou daarby uit."
Die omstandighede waaronder Semenya toegelaat sal word om haar loopbaan voort te sit, bly onseker.

Die resultate van die geslagstoetse wat op die omstrede atleet, Caster Semenya gedoen is, sal ‘n geheim bly, het die departement van sport en ontspanning gesê.

“Ons het met die Internasionale Vereniging van Atletiekfederasies (IAAF) ooreengestem dat alle toetse vertroulik is en ‘n privaatsaak tussen die dokter en die pasiënt sal bly," het die departement gesê.

"Daarom sal daar geen publieke aankondiging gemaak word oor wat die paneel van wetenskaplikes bevind het nie,” het hulle luidens ‘n verklaring gesê.

Daar is bevind dat die atleet nie vir die omstandighede blameer moet word nie en dat sy haar prys wat sy in Berlyn gewen het, moet terug kry.

“Caster Semenya is onskuldig bevind en sal dus haar gouemedalje terug kry, haar titel as die 800m wêreldkampioen behou en haar prysgeld ontvang,” het die department gesê.