Afriforum skors bekende lid weens ‘rassistiese taalgebruik’

Solidariteit en Afriforum voer 'n veldtog teen rassisme, soos uit dié plakkaat blyk.

(L.W. Nie vir sensitiewe lesers.) Afriforum het verlede week een van sy lede, die oudredakteur van Die Volksblad, Jonathan Crowther, summier geskors omdat hy hom glo aan rassistiese taalgebruik oor spoedhobbels in Bloemfontein skuldig gemaak het. Crowther het blykbaar die spoedhobbels in die voorstad Heuwelsig as “kafferkak op sy heel fokken beste” beskryf.

Sy gekruide taalgebruik het per ongeluk op Whatsapp-groep van Afriforum beland. Hy was besig om ‘n stemboodskap aan die groep op te neem toe hy oor die spoedhobbel ry. Omdat ‘n Whatsapp-stemboodskap outomaties stuur as mens die knoppie ophou druk, kon hy nie keer dat sy privaat opmerking op die groep beland nie.

Crowther was van 1999 tot 2009 redakteur van Die Volksblad in Bloemfontein. Terwyl Beeld en Die Burger geswymel het oor Jonathan Jansen as rektor van Kovsies, het Crowther die gemeenskap in die Vrystaat toegelaat om hul bedenkinge oor hom uit te spreek, iets wat seker nie polities korrek was in Naspers/Media 24-geledere nie.

Ná sy stemboodskap het Crowther ‘n skriftelike verskoning aan Afriforum gestuur, maar die organisasie het dit nie aanvaar nie. Mnr. Hein Gonzales van Afriforum was onverbiddellik:  “Ons beskou dit as ’n erkenning van skuld. Hy is onmiddellik permanent as AfriForum-lid onthef en summier van alle strukture verwyder. Ek kan nie sterk genoeg beklemtoon dat AfriForum alle vorme van rassisme ten sterkste veroordeel nie.”

Neem deel aan die gesprek en lewer gerus hier onder kommentaar!

L.W. U gebruik die Disqus-kommentaarafdeling op eie risiko en PRAAG, die redaksie of enige verwante persone of entiteite aanvaar geen verantwoordelikheid vir u kommentaar en watter gevolge ook al daaruit mag voortspruit nie. Terselfdertyd vereis ons dat u ter wille van beskaafdheid, redelikheid en die gerief van ander gebruikers, u sal weerhou van kwetsende taalgebruik, vloekwoorde, persoonlike aanvalle op medegebruikers, twissoekery en algemene "trol"-gedrag. Enigeen wat só 'n laspos word, sal summier verbied word en sy IP-adres sal insgelyks versper word. Ons sal ook nie huiwer om, waar nodig, kriminele klagte aanhangig te maak teen individue wat hulle aan dreigemente, teistering of intimidasie skuldig maak nie.